დაშვება LexisNexis-ზე ყველა სასამართლოსთვის
2019-02-06
დღეიდან თბილისის სააპელაციო სასამართლოსა და ყველა საერთო სასამართლოს მიენიჭა შეუზღუდავი დაშვება მსოფლიოში საუკეთესო სამართლებრივ საძიებო სისტემა LexisNexis-ზე. LexisNexis საყოველთაოდ ცნობილი ამერიკული სამართლებრივი საძიებო სისტემაა. LexisNexis მოიცავს აშშ-ს, დიდი ბრიტანეთის და ევროკავშირის ქვეყნების სასამართლო გადაწყვეტილებებს, კანონმდებლობას, დოქტრინალურ ლიტერატურას, სამართლებრივ სიახლეებსა და სხვა მრავალ სასარგებლო რესურსს. დარწმუნებული ვართ, რომ LexisNexis სასარგებლო იქნება განსაკუთრებით მოსამართლეებისა და მოსამართლეთა თანაშემწეებისთვის, მათ შორის, სასამართლო გადაწყვეტილებათა დასაბუთების თვალსაზრისით. პროექტი განხორციელდა თბილისის სააპელაციო სასამართლოს ინიციატივითა და ევროკავშირის სასამართლო რეფორმის მხარდაჭერის პროექტის დახმარებით, რისთვისაც განსაკუთრებულ მადლობას ვუხდით როგორც თავად პროექტს, ასევე პირადად პროექტის ხელმძღვანელის მოადგილე მაია ჩოჩუას.
ვრცლად
იმიტირებული სასამართლო პროცესი თბილისის სააპელაციო სასამართლოში
2018-12-11
თბილისის სააპელაციო სასამართლოში იმიტირებული სასამართლო პროცესი გაიმართა. საგანმანათლებლო პროექტების ფარგლებში, 2018 წლის 1,2 და 8 დეკემბერს თბილისის სააპელაციო სასამართლოში, იუსტიციის სამინისტროს სსიპ „დანაშაულის პრევენციის ცენტრის” საქართველოს მთავარ პროკურატურასა და სულხან-საბა ორბელიანის სახელობის სასწავლო უნივერსიტეტის მხარდაჭერით, იმიტირებული პროცესი გაიმართა, რომელიც რამდენიმე კვირის განმავლობაში მიმდინარეობდა და მასში თბილისის 20 სხვადასხვა სკოლისა და მარნეულის მუნიციპალიტეტის 7 საჯარო სკოლის 200-მდე მოსწავლემ მიიღო მონაწილეობდა. დასკვნით ეტაპზე 8 სასამართლო პროცესი გაიმართა. ,,იმიტირებული სასამართლო პროცესი სკოლის მოსწავლეებისთვის - 2018’’ გაიმარჯვა ქ. თბილისის 159-ე საჯარო სკოლის გუნდმა. იმიტირებული სასამართლო პროცესი, თბილისის სააპელაციო სასამართლოს საგანმანათლებლო პროგრამის ერთ-ერთი კომპონენტია, რომელიც მიზნად ისახავს მომავალი იურისტების პრაქტიკული უნარ-ჩვევების განვითარების ხელშეწყობას და ცოდნის გაღრმავებას.
ვრცლად
სასამართლო ტური 174-ე სკოლის მოსწავლეებისთვის
2018-12-07
თბილისის საპელაციო სასამართლოს საგანმანათლებლო სასამართლოს ტურის პროექტის ფარგლებში, თბილისის 147-ე საჯარო სკოლის მე-IX კლასის მოსწავლეები ესტუმრნენ. შეხვედრა კითხვა-პასუხის რეჟიმში წარიმართა. მოსწავლეები გაეცნენ სასამართლო ხელისუფლების ფუნქციებს, სასამართლო სისტემას, მოსამართლის საქმიანობას, არასრულწლოვანთა უფლებებს. შემეცნებითი ხასიათის საგანმანათლებლო ტურის საშუალებით, მოსწავლეებს შესაძლებლობა აქვთ, უფრო ახლოს გაეცნონ სასამართლოს სტრუქტურის საქმიანობის სპეციფიკას. შეგახსენებთ, სასამართლო ტურზე დარეგისტრირება შეუძლიათ იურიდიული ფაკულტეტის სტუდენტებსა და სამართლით დაინტერესებულ დამამთავრებელი კლასის მოსწავლეებს. თბილისის სააპელაციო სასამართლო — მეორე ინსტანციის სასამართლოა საქართველოს საერთო სასამართლოების სისტემაში, რომელიც განიხილავს საჩივრებს პირველი ინსტანციის (რაიონული (საქალაქო)) სასამართლოების მიერ გამოტანილ გადაწყვეტილებებზე. თბილისის სააპელაციო სასამართლოს განსჯადობა ვრცელდება აღმოსავლეთ საქართველოზე.
ვრცლად
თბილისის სააპელაციო სასამართლო განცხადება ადვოკატების ტ. კაკაბაძისა და ი. ჩომახაშვილის ბრიფინგთან დაკავშირებით
2018-09-13
თბილისის სააპელაციო სასამართლო განცხადებას ავრცელებს ადვოკატების ტ. კაკაბაძისა და ი. ჩომახაშვილის ბრიფინგთან დაკავშირებით: 2018 წლის 12 სექტემბერს თბილისის სააპელაციო სასამართლოში დასრულდა სისხლის სამართლის საქმის განხილვა კ.ფ-ს, ბ.ჯ-ს და რ.ჟ-ს მიმართ, რომელთაც ბრალი ედებოდათ ცემასა და დიდი ოდენობით ქონების მიღების მიზნით, ჯგუფურად, გამოძალვისათვის. თბილისის საქალაქო სასამართლოს 2018 წლის 02 თებერვლის განაჩენით, ბ.ჯ. და რ.ჟ. სრულად იყვნენ გამართლებულები წარდგენილ ბრალდებაში, ხოლო კ.ფ. - ნაწილობრივ. საქმეზე შეკრებილი მტკიცებულებებისა და ფაქტობრივი გარემოებების ანალიზის საფუძველზე, თბილისის სააპელაციო სასამართლოს მიერ შეიცვალა თბილისის საქალაქო სასამართლოს 2018 წლის 02 თებერვლის განაჩენი და ჩადენილი ქმედების ხასიათის, სიმძიმის და ხარისხის გათვალისწინებით კ.ფ-ს, რომელიც ასევე თბილისის საქალაქო სასამართლოს იმავე განაჩენით მსჯავრდებული იყო ოჯახის წევრის მიმართ სიცოცხლის მოსპობის მუქარაში, თბილისის სააპელაციო სასამართლოს მიერ დაუმძიმდა სასჯელი 5 წლამდე ვადით, ხოლო ბ.ჯ. და რ.ჟ. ასევე ცნობილ იქნენ დამნაშავედ საქართველოს სსკ-ის 126-ე მუხლის პირველი ნაწილით და 181 მუხლის მე-2 ნაწილის „ა“ და „გ“ ქვეპუნქტებით და სასჯელის სახედ და ზომად განესაზღვრათ 4 წლით და 06 თვით თავისუფლების აღკვეთა. საქმის სააპელაციო განხილვებისას გონივრულ ეჭვს მიღმა სტანდარტით დადასტურდა, რომ კ.ფ. ბ.ჯ. და რ.ჟ. 2017 წლის 10 აპრილს მივიდნენ ა.ლ-ს ოფისში და განუცხადეს, რომ კანონიერი ქურდების გადაწყვეტილებით მათთვის უნდა გადაეცათ კუთვნილი გაზგასამართი სადგურის ოცდახუთპროცენტიანი წილი. უარის მიღების შემდეგ კ.ფ-მ დანის გამოყენებით კისრისა და მარცხენა მტევნის მიდამოში ა.ლ-ს მიაყენა დაზიანება, ხოლო შემდგომ პერიოდში ბ.ჯ. და რ.ჟ. დროდადრო აკითხავდნენ დაზარალებულს და კვლავ მოითხოვდნენ მისგან წილის დათმობას ან 200 000 აშშ დოლარს. თბილისის სააპელაციო სასამართლოს გადაწყვეტილება შეიძლება გასაჩივრდეს განაჩენის გამოცხადებიდან ერთი თვის ვადაში, საქართველოს უზენაესი სასამართლოს სისხლის სამართლის საქმეთა პალატაში.
ვრცლად
გილოცავთ ბავშვთა დაცვის საერთაშორისო დღეს!
2018-06-01
გილოცავთ პირველი დემოკრატიული რესპუბლიკის დაარსებიდან 100 წლის იუბილეს .
2018-05-25
15 მაისს მოსამართლის პროფესიული დღე აღინიშნება.
2018-05-15
თბილისის სასწავლო უნივერსიტეტის სტუდენტები თბილისის სააპელაციო სასამართლოში
2018-05-11
10 მაისს, თბილისის სასწავლო უნივერსიტეტის სტუდენტებმა თბილისის სააპელაციო სასამართლოში იმიტირებული სასამართლო პროცესი გამართეს.იმიტირებული პროცესის ფარგლებში, სამართალმცოდნეობის საბაკალავრო პროგრამის მე-3 და მე-4 კურსის სტუდენტებმა მიიღეს მონაწილეობა. პროცესის ორგანიზებაში მონაწილეობდნენ უნივერსიტეტის სამართლის სკოლის აკადემიური პერსონალი. პროცესის დასრულების შემდეგ, ჟიურიმ საუკეთესო მონაწილეებს სერტიფიკატები გადასცა. შეგახსენებთ, რომ თბილისის სააპელაციო სასამართლოში განგრძობადი განათლების პროექტი 2011 წლიდან ხორციელდება და ხელს უწყობს სხვადასხვა უნივერსიტეტის იურიდიული ფაკულტეტის სტუდენტების პროფესიულ განვითარებას.
ვრცლად
თბილისის სააპელაციო სასამართლომ გ.ლ-ი დამნაშავედ ცნო ს.ტ-ს გაუფრთხილებლობით სისცოცხლის მოსპობაში
2018-04-25
2018 წლის 25 აპრილს თბილისის სააპელაციო სასამართლოში დასრულდა სისხლის სამართლის საქმის განხილვა ს.ტ.-ს გაუფრთხილებლობით სიცოცხლის მოსპობის ფაქტზე. საქმეზე შეკრებილი მტკიცებულებებისა და ფაქტობრივი გარემოებების ანალიზის საფუძველზე გაუქმდა თბილისის საქალაქო სასამართლოს 2017 წლის 29 დეკემბრის გამამართლებელი განაჩენი გ.ლ-ის მიმართ და იგი ცნობილ იქნა დამნაშავედ სხვისი სიცოცხლის გაუფრთხილებლობით მოსპობისათვის, გათვალიწინებული საქართველოს სისხლის სამართლის კოდექსის 116-ე მუხლის პირველი ნაწილით. საქმის კოლეგიური წესით განხილვების შედეგად სასამართლომ დადასტურებულად მიიჩნია, რომ გ.ლ-მ გუდაურში, სათხილამურო ტრასაზე სრიალისას არ გაუწია კონტროლი საკუთარ მოძრაობას, არ მოახდინა სათანადო დისტანცირება და მაღალი სიჩქარით შეეჯახა მის წინ მოსრიალე ს.ტ.-ს, რომელიც მიღებული დაზიანებების შედეგად ადგილზე გარდაიცვალა. ჩადენილი ქმედების ხასიათის, სიმძიმის და ხარისხის გათვალისწინებით გ.ლ-ს 3 წლით თავისუფლების აღკვეთა განესაზღვრა.
ვრცლად
საქველმოქმედო აქცია ჩვილ ბავშვთა სახლის დასახმარებლად
2018-04-02
31 მარტს, თბილისის სააპელაციო სასამართლოს თანამშრომლებმა და მოსამართლეებმა, თბილისის ჩვილ ბავშვთა სახლი მოინახულეს. სასამართლოს თანამშრომლებმა ბავშვებს სათამაშოები, ტკბილეული, მცირე საოჯახო ტექნიკა და საბავშვო მხატვრული ლიტერატურა გადასცეს. ღონისძიების მიზანია სოციალურად დაუცველ ბავშვებზე ზრუნვა და მათი თანადგომა. სააპელაციო სასამართლოს მხრიდან ეს იყო პირველი სტუმრობა ჩვილ ბავშვთა სახლში, სასამართლოს თანამშრომლები მომავალშიც აქტიურად გეგმავენ მსგავსი ტიპის საქველმოქმედო აქციების განხორციელებას.
ვრცლად
ერთად გავუფრთხილდეთ დედამიწას!
2018-03-23
ერთად გავუფრთხილდეთ დედამიწას! 24 მარტს თბილისის სააპელაციო სასამართლო საერთაშორისო გარემოსდაცვით აქციას - „დედამიწის საათს" შეუერთდება.
ვრცლად
კაზუსების ამოხსნის მეთოდიკა
2018-03-21
იუსტიციის უმაღლესი სკოლა აცხადებს მსურველთა მიღებას კურსზე - კაზუსის ამოხსნის მეთოდიკა: სამოქალაქო და ადმინისტრაციულ სამართალში კურსის ხანგრძლივობა 36 საათი (10 სამუშაო დღე) სისხლის სამართალში კურსის ხანგრძლივობა 21 საათი და 30 წუთი (6 სამუშაო დღე) რეგისტრაციის დაწყება: 21 მარტი 2018 წელი რეგისტრაციის დასრულება: 10 აპრილი 2018 წელი სწავლების დაწყება: 17 აპრილი 2018 წელი დაინტერესებულმა პირებმა უნდა შეავსონ სარეგისტრაციო ფორმა იუსტიციის უმაღლესი სკოლის ვებ-გვერდზე. მონაწილეებთან დაკავშირება მოხდება ელექტრონული ფოსტის მეშვეობით. დაწვრილებითი ინფორმაციის მისაღებად გთხოვთ მიჰყვეთ ბმულს: http://www.hsoj.ge/geo/study_programs/courses/kazus ტელ: (+995 32) 238 11 61 მობ: (+995 599) 68 69 01 ელ-ფოსტა: info@hsoj.ge ვებ-გვერდი: www.hsoj.ge Facebook: https://www.facebook.com/hsoj.ge/ გთხოვთ გაითვალისწინოთ, ადგილები შეზღუდულია!
ვრცლად
21 მარტი დაუნის სინდრომის მსოფლიო დღეა!
2018-03-21
თბილისის სააპელაციო სასამართლო უერთდება კამპანიას წინდამინდა. ჩვენ არ ვითვლით ქრომოსომებს! ყოველთვის უნდა გვახსოვდეს, რომ მათზე ზრუნვა და სრულფასოვანი საზოგადოებრივი ცხოვრებისთვის მომზადება ჩვენი უპირველესი ვალია. ისინი კი ჩვენს იმედებს ყოველთვის გაამართლებენ, რადგანაც არაჩვეულებრივი ადამიანები არიან!
ვრცლად
სასამართლოსა და თბილისის ჰუმანიტარულ სასწავლო უნივერსიტეტს შორის მემორანდუმი გაფორმდა
2018-03-15
14 მარტს, თბილისის სააპელაციო სასამართლომ კიდევ ერთი ურთიერთთანამშრომლობის მემორანდუმი გააფორმა, ამჯერად თბილისის ჰუმანიტარულ სასწავლო უნივერსიტეტთან. მემორანდუმს უნივერსიტეტის პრორექტორმა კახი ყურაშვილმა და თბილისის სააპელაციო სასამართლოს მენეჯერმა ვანო ბოლქვაძემ მოაწერეს ხელი. მემორანდუმის ფარგლებში, სასამართლო უზრუნველყოფს უნივერსიტეტის იურიდიული ფაკულტეტის საბაკალავრო პროგრამის დამამთავრებელი კურსის სტუდენტებს სასამართლო პრაქტიკის ორგანიზებასა და განხორციელებაში. შეგახსენებთ, რომ თბილისის სააპელაციო სასამართლო აქტიურად თანამშრომლობს სხვადასხვა საგანმანათლებლო დაწესებულებებთან სტუდენტთა სამართლებრივი ცოდნისა და პრაქტიკული უნარ-ჩვევების გაუმჯობესების მიზნით.
ვრცლად
ურთიერთთანამშრომლობის მემორანდუმი
2018-03-05
2 მარტს, გურამ თავართქილაძის სახელობის თბილისის სასწავლო უნივერსიტეტსა და თბილისის სააპელაციო სასამართლოს შორის ურთიერთთანამშრომლობის მემორანდუმი გაფორმდა. თანამშრომლობის მემორანდუმს ხელი მოაწერეს უნივერსიტეტის რექტორმა გიორგი მათიაშვილმა და თბილისის სააპელაციო სასამართლოს მენეჯერმა ვანო ბოლქვაძემ. მემორანდუმის მიზანია სასამართლოსა და უნივერსიტეტს შორის თანამშრომლობის გაღრმავება და სტუდენტების პრაქტიკული უნარ-ჩვევების განვითარება, რაც ხელს შეუწყობს სტუდენტთა სწავლების ხარისხის ამაღლებას.
ვრცლად
აღდგენითი მართლმსაჯულების ექსპერტთან კრისპა პელიკანთან შეხვედრა გაიმართა
2018-03-02
2 მარტს, თბილისის სააპელაციო სასამართლოს აღდგენითი მართლმსაჯულების საერთაშორისო ექსპერტი კრისტა პელიკა ეწვია. შეხვედრა განკუთვნილი იყო თბილისის საქალაქო, სააპელაციო და უზენაესი სასამართლოების ანალიტიკური რგოლების თანამშრომლებისთვის. ღონისძიებაზე განხილულ იქნა სასამართლო პრაქტიკის კრიმინოლოგიური კვლევისა და აღდგენითი მართლმსაჯულების პროცესის კვლევის თავისებურებები, ასევე სისხლის სამართლის პოლიტიკის ცვლილებაზე მიმართული კვლევის დაგეგმვისა და განხორციელების საკითხები. შეხვედრა გაიმართა ევროკავშირის სასამართლოს მხარდაჭერის პროექტის (EU4Justice) ინიციატივითა და ორგანიზებით.
ვრცლად
ურთიერთთანამშრომლობის მემორანდუმის გაფორმება თბილისის სასწავლო უნივერსიტეტთან
2018-02-06
თბილისის სასწავლო უნივერსიტეტსა და თბილისის სააპელაციო სასამართლოს შორის ურთიერთთანამშრომლობის მემორანდუმი გაფორმდა. მემორანდუმის მიზანია სასამართლოსა და უნივერსერსიტეტს შორის თანამშრომლობის გაღრმავება და სტუდენტების პრაქტიკული უნარ-ჩვევების განვითარება, რაც ხელს შეუწყობს სტუდენტთა სწავლების ხარისხის ამაღლებას. თანამშრომლობის მემორანდუმს ხელი მოაწერეს უნივერსუტეტის რექტორმა ლევან ჯანგულაშვილმა და სააპელაციო სასამართლოს მენეჯერმა ვანო ბოლქვაძემ. მემორანდუმის ფარგლებში, სასამართლო უზრუნველყოფს უნივერსიტეტის სამართლის საბაკალავრო პროგრამის დამამთავრებელი კურსის სტუდენტებს სასამართლო პრაქტიკის ორგანიზებასა და განხორციელებაში. მემორანდუმით გათვალისწინებული პირობებით, სასამართლო უზრუნველყოფს მატერიალურ-ტექნიკური ბაზით, უზრუნველყოფილ სხდომის დარბაზებს უნივერსიტეტის მიერ იმიტირებული პროცესების ჩატარებისათვის, ასევე უზრუნველყოფს სამართლის ელექტრონულ ბიბლიოთეკაში უნივერსიტეტის მიერ მომზადებული საქმეთა ანალიზების (ე.წ. Case Brief-ების) განთავსებასა და მათი შესაბამისი საქმის მოსამართლეებისათვის მიწოდებას. თბილისის სააპელაციო სასამართლოს აქტიურად თანამშრომლობს სხვადასხვა სასწავლო დაწესებულებებთან, მათ შორის, თავისუფალ უნივერსიტეტთან, საქართველოს ტექნიკურ უნივერსიტეტთან, სულხან-საბა ორბელიანის სახელობის სასწავლო უნივერსიტეტთან, კავკასიის საერთაშორისო უნივერსიტეტთან, ქართულ უნივერსიტეტთან. ჩვენ მაქსიმალურად ვცდილობთ ხელი შევუწყოთ ხარისხიან განათლებას. დღევანდელი მდგომარეობით, სააპელაციო სასამართლოში 70-მდე სტუდენტი გადის სტაჟირებას.
ვრცლად
დათვალიერების ჩატარებისას განხორციელებულ ფოტოგადაღებასა და ინფორმაციის გამოთხოვის პროცედურებს შორის განსხვავება
2018-02-05
,,დათვალიერების ჩატარებისას განხორციელებული ფოტოგადაღება აბსოლუტურად განსხვავდება სისხლის სამართლის საპროცესო კოდექსის 136-ე მუხლით დარეგულირებული დოკუმენტის ან ინფორმაციის გამოთხოვის პროცედურისგან როგორც თავისი არსით, ისე პროცესუალური ფორმით... დათვალიერებისა და ამ დროს განხორციელებული ფოტოგადაღებისას მიღებულ ინფორმაციას ვერ ექნება პრეტენზია უტყუარობასთან დაკავშირებით, ვინაიდან ამ დროს არ არის მოპოვებული თვით ამ ინფორმაციის პირველწყარო, რომელზეც შეიძლება ჩატარდეს ტექნიკურ-კომპიუტერული ექსპერტიზა მისი ავთენტიკურობის და ნამდვილობის დასადგენად, აგრეთვე იმის დასადგენად, შეინიშნება თუ არა მასზე მონტაჟის ან სხვა კანონსაწინააღმდეგო მანიპულაციების ნიშნები...“ წარმოგიდგენთ თბილისის სააპელაციო სასამართლოს საგამოძიებო კოლეგიის განჩინებას №1გ/133-18 (2018-02-02) . განჩინება საბოლოოა და გასაჩივრებას არ ექვემდებარება. საქმის მასალების მიხედვით, წინასასამართლო სხდომაზე მოსამართლემ დაუშვებლად ცნო დაცვის მხარის მიერ წარდგენილი ექსპერტიზის ეროვნული ბიუროს წერილი და დათვალიერების ოქმზე თანდართული ფოტოილუსტრაცია. აღნიშნული განჩინება ადვოკატმა გაასაჩივრა თბილისის სააპელაციო სასამართლოში და ითხოვა წინასასამართლო სხდომის განჩინების გაუქმება დაცვის მხარის მტკიცებულებათა დაუშვებლად ცნობის ნაწილში და ამ მტკიცებულებების დასაშვებად ცნობა. აღნიშნული საჩივარი დაკმაყოფილდა საგამოძიებო კოლეგიის მიერ და დაცვის მხარის მტკიცებულებები დასაშვებად იქნა ცნობილი. ექსპერტიზის ეროვნული ბიუროს წერილთან დაკავშირებით მოსამართლემ განჩინებაში აღნიშნა, რომ წერილი შეიცავდა ოფიციალური დოკუმენტისათვის დამახასიათებელ ყველა ნიშანს და ეჭვს არ ტოვებდა მისი წარმომავლობა. ხოლო დათვალიერების ოქმზე თანდართულ ფოტოილუსტრაციასთან დაკავშირებით განმარტა, რომ დათვალიერების პროცესის შემადგენელი ნაწილია ფოტოგადაღებაც და თუ დათვალიერება ჩატარდა საპროცესო ნორმების დაცვით, მაშინ ფოტოგადაღებაც ვერ იქნებოდა არსებული მოთხოვნების საწინააღმდეგო. ამასთან, განჩინებაში მოსამართლე განმარტავს, თუ რა განსხვავებაა დათვალიერების ჩატარებისას განხორციელებულ ფოტოგადაღებასა და ინფორმაციის გამოთხოვის პროცედურებს შორის. განჩინებაში არსებითად განხილულია შემდეგი თემები: ☛ მტკიცებულებათა დაუშვებლად ცნობა წინასასამართლო სხდომაზე; ☛ მტკიცებულების ავთენტურობა; ☛ დათვალიერების ჩატარებისას ფოტოგადაღება; ☛ დოკუმენტის ან ინფორმაციის გამოთხოვა.
ვრცლად
თბილისის სააპელაციო სასამართლომ პროკურატურის საჩივარი დააკმაყოფილა
2018-01-17
თბილისის სააპელაციო სასამართლოს საგამოძიებო კოლეგიის 2018 წლის 17 იანვრის განჩინებით, დაკმაყოფილდა ქ. თბილისის დიდუბე-ჩუღურეთის რაიონული პროკურატურის საჩივარი, გაუქმდა თბილისის საქალაქო სასამართლოს სისხლის სამართლის საქმეთა საგამოძიებო, წინასასამართლო სხდომისა და არსებითი განხილვის კოლეგიის, 2018 წლის 15 იანვრის განჩინება და ბრალდებულ თ.ქ.-სთვის, შეფარდებული აღკვეთი ღონისძიება გირაო 30 000 ლარის ოდენობით, შეიცვალა აღკვეთი ღონისძიებით პატიმრობით. ბრალდებულ თ. ქ.-ს ბრალად ედება 13 იანვარს კლუბ “ბასიანში” დაცვის ორი წევრის დაჭრა და პოლიციის მუშაკის კანონიერი მოთხოვნისადმი დაუმორჩილებლობა, რომლის დროსაც პოლიციის თანამშრომელმა მიიღო ხელის ნაკვეთი ჭრილობა.
ვრცლად
კვალიფიკაციის ასამაღლებელი კურსები
2018-01-15
იუსტიციის უმაღლესი სკოლა აცხადებს მსურველთა მიღებას კვალიფიკაციის ასამაღლებელ კურსზე: სამოქალაქო/ადმინისტრაციული სამართლის მიმართულება სწავლების ადგილი: სწავლება განხორციელდება იუსტიციის უმაღლესი სკოლის თბილისის ცენტრალურ ოფისსა (თბილისის ჯგუფი) და წყალტუბოს რეგიონულ სასწავლო ცენტრში (დასავლეთ საქართველოს ჯგუფი) სისხლის სამართლის მიმართულება სწავლების ადგილი: თბილისის ცენტრალური ოფისი რეგისტრაციის დაწყება: 15 იანვარი 2018 წ; რეგისტრაციის დასრულება: 3 თებერვალი 2018 წ; სწავლების დაწყება: 12 თებერვალი 2018 წ; დაინტერესებულმა პირებმა გთხოვთ შეავსოთ სარეგისტრაციო ფორმა იუსტიციის უმაღლესი სკოლის ვებ-გვერდზე. დაწვრილებითი ინფორმაციის მისაღებად და რეგისტრაციის გასავლელად, გთხოვთ მიჰყვეთ ბმულს: www.hsoj.ge/geo/study_programs/courses/mosgamo ტელ: (+995 32) 238 11 61 მობ: (+995 599) 68 69 01 ელ-ფოსტა: info@hsoj.ge ვებ-გვერდი:www.hsoj.ge Facebook: www.facebook.com/hsoj.ge/
ვრცლად
წინასასამართლო სხდომის ეტაპზე აღკვეთის ღონისძიების საკითხის გასაჩივრების წესი
2018-01-08
,,წინასასამართლო სხდომის ეტაპზე საჩივრდება მტკიცებულებათა დაუშვებლად ცნობის შესახებ განჩინება და განჩინება სისხლისსამართლებრივი დევნის შეწყვეტის შესახებ, ხოლო აღკვეთის ღონისძიების შესახებ გადაწყვეტილება არ საჩივრდება საგამოძიებო კოლეგიაში“. წარმოგიდგენთ თბილისის სააპელაციო სასამართლოს საგამოძიებო კოლეგიის განჩინებას №1გ/1487-17 (2017-12-28) . განჩინება საბოლოოა და გასაჩივრებას არ ექვემდებარება. საქმის მასალების მიხედვით, მ.ლ.-ს წარედგინა ბრალდება ოჯახში ძალადობის ფაქტზე ჩადენილი წინასწარი შეცნობით არასრულწლოვნის მიმართ. პირველი ინსტანციის სასამართლოს განჩინებით ბრალდებულს გირაო შეეფარდა. ხოლო წინასასამართლო სხდომაზე გირაო შეიცვალა პატიმრობით, ვინაიდან ბრალდებულმა დადგენილ ვადაში არ უზრუნველყო გირაოს თანხის გადახდა. ამასთან, ბრალდებული მოთავსებულ იქნა ექსპერტიზის ეროვნულ ბიუროში სტაციონარული სასამართლო ფსიქიატრიული ექსპერტიზის ჩატარების მიზნით. აღნიშნული განჩინება გაასაჩივრა ბრალდებულის ადვოკატმა სააპელაციო სასამართლოში. დაცვის მხარემ მიიჩნია, რომ მ.ლ. არ უნდა იქნას გადაყვანილი ფსიქიატრიულ დაწესებულებაში, ამასთან უნდა გაუქმდეს აღკვეთის ღონისძიების სახით შეფარდებული პატიმრობა. საგამოძიებო კოლეგიამ საჩივარი დაუშვებლად ცნო და განჩინებაში განმარტა, რომ წინასასამართლო სხდომის ეტაპზე აღკვეთის ღონისძიების შესახებ მიღებული გადაწყვეტილება არ საჩივრდება საგამოძიებო კოლეგიაში. განჩინებაში არსებითად განხილულია შემდეგი თემები: ☛ აღკვეთის ღონისძიების შეცვლის საკითხი; ☛ წინასასამართლო სხდომის ეტაპზე აღკვეთის ღონისძიების საკითხის გასაჩივრების წესი; ☛ სასამართლო ფსიქიატრიული ექსპერტიზის ჩატარება; ☛ ოჯახში ძალადობა.
ვრცლად
© 2013, თბილისის სააპელაციო სასამართლო
ქ. თბილისი, გრ. რობაქიძის გამზ. 7ა, 0159
სატელეფონო ცენტრი: (+995 32) 251 85 21

საიტის ძველი ვერსია