8 ივნისს, თბილისის სააპელაციო სასამართლოს ააიპ ,,ინოვაციური განათლების ცენტრის" სტუდენტები ეწვივნენ. ტრადიციისამებრ, სტუდენტებისთვის ,,სასამართლო ტურის" პროექტის ფარგლებში პრეზენტაცია გაიმართა, რომელსაც თავმჯდომარის ბიუროს კონსულტანტი ნათია გაბინაშვილი უძღვებოდა. პრეზენტაცია შეეხებოდა სასამართლოების სისტემას, თბილისის სააპელაციო სასამართლოს სტრუქტურას, მოსამართლის როლს და სხვა სამართლებრივ საკითხებს. ტურის ბოლოს სტუდენტებმა დაათვალიერეს სასამართლო სხდომის დარბაზები. შეგახსენებთ, სასამართლო ტურის პროექტის ფარგლებში თბილისის სააპელაციო სასამართლოს პერმანენტულად სტუმრობენ სხვადასხვა სასწავლო დაწესებულებების დამამთავრებელი კლასის მოსწავლეები და იურიდიული ფაკულტეტის სტუდენტები.

1 ივნისს, თბილისის სააპელაციო სასამართლოს 213-ე საჯარო სკოლის მოსწავლეები ეწვივნენ. სასამართლო ტურის პირველი ნაწილი პრეზენტაციას დაეთმო, რომელსაც უძღვებოდა თავმჯდომარის ბიუროს კონსულტანტი თათია ქვრივიშვილი. მოსწავლეები გაეცნენ სასამართლო სისტემას, მოსამართლის როლს, ბავშვთა უფლებებს, ასევე იმსჯელეს სხვადასხვა კაზუსებზე. ტურის ბოლოს კი, ტრადიციისამებრ, დაათვალიერეს სასამართლო სხდომის დარბაზები.

25 მაისს, სასამართო ტურის პროექტის ფარგლებში, თბილისის სააპელაციო სასამართლოს თბილისის სახელმწიფო უნივერსიტეტის იურიდიული ფაკულტეტის პირველი კურსის სტუდენტები ეწვივნენ. ტურის პირველ ნაწილში, ტრადიციისამებრ, პრეზენტაცია გაიმართა, რომელსაც უძღვებოდა სასამართლოს თავმჯდომარის ბიუროს კონსულტანტი თამარ ერგემლიძე. პრეზენტაცია შეეხებოდა სასამართლო სისტემას, მოსამართლის როლს და სხვადასხვა აქტუალურ სამართლებრივ საკითხებს. ტურის ბოლოს, სტუდენტებმა დაათვალიერეს სასამართლო სხოდმის დარბაზები.

წარმოგიდგენთ საჯარო ლექციის ვიდეო ჩანაწერს თემაზე: "რატომ არის მედიაცია და დაგი (ADR) კრიტიკული თქვენი პროფესიული მომავლისათვის" საჯარო ლექციას კითხულობს ვიქტორ შახტერი - კანონის უზენაესობის მდგრადი ინიციატივების ფონდის (FSRI) დამფუძნებელი და დირექტორი. საჯარო ლექცია ჩატარდა თბილისის სახელმწიფო უნივერსიტეტის I კორპუსში 2017 წლის 3 ოქტომბერს. ღონისძიება ჩატარდა თბილისის სახელმწიფო უნივერსიტეტის, ა(ა)იპ „საქართველოს მედიატორთა ასოციაციის“, დავის ალტერნატიული გადაწყვეტის ეროვნული ცენტრის (NCADR), იურიდიული კომპანია “ჯეი ენდ თი ქონსალთინგისა“ და თბილისის სააპელაციო სასამართლოს თანამშრომლობით.

წარმოგიდგენთ საჯარო ლექციის ვიდეო ჩანაწერს თემაზე: "შრომის სამართლის უნიფიკაცია და მოთხოვნაზე დაფუძნებული ეკონომიკის აღმავლობა" საჯარო ლექციას კითხულობს რიჩარდ ბეილსი - ოჰაიოს ჩრდილოეთ უნივერსიტეტის (აშშ) სამართლის კოლეჯის პროფესორი, დეკანი (2013-2016 წწ.). საჯარო ლექცია ჩატარდა თბილისის სახელმწიფო უნივერსიტეტის I კორპუსში 2017 წლის 10 ოქტომბერს. ღონისძიება გაიმართა თბილისის სახელმწიფო უნივერსიტეტის, ა(ა)იპ „თანამედროვე შრომის სამართლის ცენტრის“, თბილისის სააპელაციო სასამართლოსა და შავი ზღვის საერთაშორისო უნივერსიტეტის თანამშრომლობით.

იუსტიციის უმაღლესი სკოლა აცხადებს მსურველთა მიღებას მოსამართლეობის საკვალიფიკაციო გამოცდისათვის მოსამზადებელ კურსზე: - სამოქალაქო/ადმინისტრაციული სამართლის სპეციალიზაცია - სისხლის სამართლის სპეციალიზაცია რეგისტრაციის დაწყება: 28 სექტემბერი. 2017 წ რეგისტრაციის დასრულება: 8 ოქტომბერი 2017 წ სწავლების დაწყება: 16 ოქტომბერი 2017 წ დაინტერესებულმა პირებმა უნდა შეავსონ სარეგისტრაციო ფორმა იუსტიციის უმაღლესი სკოლის ვებ-გვერდზე. მონაწილეებთან დაკავშირება მოხდება ელექტრონული ფოსტის მეშვეობით. დაწვრილებითი ინფორმაციის მისაღებად გთხოვთ მიჰყვეთ ბმულს: http://www.hsoj.ge/geo/study_programs/courses/mosgamo ტელ: (+995 32) 238 11 61 მობ: (+995 599) 68 69 01 ელ-ფოსტა: info@hsoj.ge ვებ-გვერდი: www.hsoj.ge Facebook: www.facebook.com

წარმოგიდგენთ თბილისის სააპელაციო სასამართლოს საგამოძიებო კოლეგიის განჩინებას №1გ/1206-17 (2017-10-05) . განჩინება საბოლოოა და გასაჩივრებას არ ექვემდებარება. საქმის მასალების მიხედვით, ვ. ჟ.-ს წარედგინა ბრალდება სსკ-ის 273(1) მუხლის მე-2 ნაწილით - ნარკოტიკული საშუალება მარიხუანას უკანონო შეძენა, შენახვისათვის. პროკურორმა ახალციხის რაიონულ სასამართლოს მიმართა ბრალდებულის მიმართ აღკვეთის ღონისძიების სახით გირაოს 1000 ლარის ოდენობით გამოყენების მოთხოვნით. აღნიშნული შუამდგომლობა დაკმაყოფილდა ნაწილობრივ და ბრალდებულს აღკვეთის ღონისძიების სახით შეეფარდა შეთანხმება გაუსვლელობისა და სათანადო ქცევის შესახებ. აღნიშნული განჩინება გასაჩივრდა თბილისის სააპელაციო სასამართლოში პროკურორის მიერ ბრალდებულისათვის გირაოს შეფარდების მოთხოვნით. საგამოძიებო კოლეგიამ საჩივარი დაუშვებლად ცნო. ამასთან განჩინებაში განმარტა, რომ დაუშვებელია პირველი ინსტანციის სასამართლოს იმგვარი მსჯელობა, რომლის მიხედვითაც გირაოს გამოყენებაზე უარის თქმის მოტივად მითითებულია მუხლის სანქციად თავისუფლების აღკვეთის არ არსებობა; ვინაიდან, თუ ბრალდებულის ქონებრივი მდგომარეობა და საქმის სხვა გარემოებები იძლევა კანონიერ საფუძველს ბრალდებულისათვის გირაოს გამოყენებაზე, ბრალდებულს შესაძლებელია შეეფარდოს გირაო აღკვეთის ღონისძიებად და დაეკისროს ასევე სხვა დამატებითი ვალდებულებები, მიუხედავად იმისა ითვალისწინებს თუ არა თავისუფლების აღკვეთას სანქციის სახედ ის მუხლი, რომელიც წარდგენილი აქვს პირს ბრალად. განჩინებაში არსებითად განხილულია შემდეგი თემები: ☛ აღკვეთის ღონისძიების მიზნები და საფუძვლები; ☛ შეთანხმება სათანადო ქცევისა და გაუსვლელობის შესახებ; ☛ გირაოს გამოყენების წინაპირობები; ☛ მარიხუანას უკანონო შეძენა-შენახვა.

წარმოგიდგენთ თბილისის სააპელაციო სასამართლოს საგამოძიებო კოლეგიის განჩინებას №1გ/860-17 (22 ივნისი, 2017 წელი). განჩინება საბოლოოა და გასაჩივრებას არ ექვემდებარება. საქმის მასალების თანახმად, წინასასამართლო სხდომაზე დაცვის მხარის მტკიცებულებათა ნაწილი დაუშვებლად იქნა ცნობილი, იმ მოტივით, რომ დარღვეულ იქნა მტკიცებულებათა გაცვლის წესი დაცვის მხარის მიერ. აღნიშნული განჩინება გასაჩივრდა დაცვის მხარის მიერ თბილისის სააპელაციო სასამართლოში. ადვოკატი საჩივარში უთითებდა, რომ ბრალდების მხარის მოთხოვნის მომენტისათვის მას არ ჰქონია მოპოვებული არანაირი მტკიცებულება, ხოლო საგამოძიებო მოქმედებებს ატარებდა ბრალდებულის მეორე ადვოკატი. შესაბამისად, იგი ვერანაირ მტკიცებულებას ბრალდების მხარეს ვერ გადასცემდა. საგამოძიებო კოლეგიის მიერ არ დაკმაყოფილდა საჩივარი. განჩინებაში მოსამართლემ აღნიშნა, რომ დაცვის მხარეში მოიაზრება ყველა ადვოკატი, რომელიც ბრალდებულის ინტერესებს იცავს. შესაბამისად, არანაირი მნიშვნელობა არ აქვს მტკიცებულებათა გაცვლის წესის ვალდებულების შესრულებისათვის, თუ კონკრეტულად რომელი ადვოკატის მიერ ხდება მტკიცებულებათა მოპოვება. განჩინებაში არსებითად განხილულია შემდეგი თემები: ☛ მტკიცებულებათა გაცვლა წინასასამართლო სხდომამდე ☛ მტკიცებულებათა დაუშვებლად ცნობა ☛ მტკიცებულებათა გაცვლის ოქმი ☛ თანასწორობისა და შეჯიბრებითობის პრინციპი

,,აუცილებელი მოგერიების მდგომარეობის არსებობისათვის აუცილებელია ერთმანეთთან კავშირში მყოფი რამდენიმე გარემოების შეფასება, როგორიცაა კონფლიქტის წარმოშობის საფუძველი და მიზეზი, გამოყენებულ საშუალებათა ურთიერთშესაბამისობა, როგორც ხელმყოფის საშიშროებასთან, ისე ინტენსივობასთან. ამ გარემოებათა დადგენის გარეშე მდგომარეობა ვერ ჩაითვლება აუცილებელ მოგერიებად." წარმოგიდგენთ თბილისის სააპელაციო სასამართლოს სისხლის სამართლის საქმეთა პალატის განაჩენს №1გ/895-17 (28 სექტემბერი, 2016 წელი). განაჩენი საბოლოოა. განაჩენში არსებითად განხილულია შემდეგი თემები: ☛ აუცილებელი მოგერიება, ☛ მართლწინააღმდეგობის გამომრიცხველი გარემოება, ☛ აუცილებელი მოგერიების ფარგლების გადაცილება, ☛ განზრახ მკვლელობა.

თბილისის სააპელაციო სასამართლოს მოქალაქეთა მისაღების სივრცეში ხელმისაწვდომი გახდა უკაბელო ინტერნეტი (WiFi), რომელიც ღიაა ყველასთვის. WiFi-ს დასახელება და პაროლია: TBAPPEAL tbappeal მადლობას ვუხდით სსიპ "საერთო სასამართლოების დეპარტამენტს" სერვისის გამართვის მხრივ გაწეული დახმარებისთვის.

2017 წლის 12 ოქტომბერს თბილისის სააპელაციო სასამართლოს ა(ა)იპ „თანამედროვე შრომის სამართლის ცენტრის“ თანაორგანიზებით ეწვია ოჰაიოს ჩრდილოეთ უნივერსიტეტის (აშშ) სამართლის კოლეჯის პროფესორი, იურიდიული ფაკულტეტის ყოფილი დეკანი (2013-2016 წწ.) რიჩარდ ბეილსი. შეხვედრის მონაწილეებმა ერთმანეთს გაუზიარეს მოსაზრებები მართლმსაჯულების სფეროში არსებული გამოწვევების შესახებ (საქმეთა ნაკადის მართვა, ელექტრონული საქმისწარმოება და სხვ.) და ისაუბრეს მათი გადაჭრის პოტენციურ გზებზე.

თბილისის სააპელაციო სასამართლოს სტაჟირების კომისია აცხადებს კონკურსს სტაჟიორების მიღებაზე. კონკურსი ჩატარდება ორ ეტაპად, განაცხადების გადარჩევის და გასაუბრების ფორმით. კონკურსს ჩაატარებს თბილისის სააპელაციო სასამართლოს სტაჟირების კომისია. სააპლიკაციო ფორმის წარმოდგენა შესაძლებელია 2017 წლის 16 ოქტომბრის ჩათვლით. სტაჟირების ვადა განისაზღვრება 6 თვით. სტაჟირების წარმატებით გავლის შემთხვევაში სტაჟიორებს გადაეცემათ სერტიფიკატი. დღეის მდგომარეობით, თბილისის სააპელაციო სასამართლოში საქმიანობს სასამართლოს 42 ყოფილი სტაჟიორი, ხოლო 9 დანიშნულია მოსამართლედ სხვადასხვა ინსტანციის საერთო სასამართლოებში. დამატებითი ინფორმაცია შეგიძლიათ იხილოთ შემდეგ მისამართზე: www.hr.gov.ge "ვაკანსიების ძებნის" გვერდზე, ველში "დამსაქმებელი", მიუთითეთ „თბილისის სააპელაციო სასამართლო“.