სასამართლოში 48 სტუდენტი დაიწყებს სტაჟირებას
2017-02-20
20 თებერვალს, თბილისის სააპელაციო სასამართლომ სტუდენტთა ახალი ნაკადი მიიღო, რომლებიც მომდევნო 6 თვის განმავლობაში სასამართლოს სხვადასხვა სტრუქტურულ ერთეულში გაივლიან სტაჟირებას. დღეის მდგომარეობით, თბილისის სააპელაციო სასამართლოში საქმიანობს სასამართლოს 42 ყოფილი სტაჟიორი, ხოლო 9 დანიშნულია მოსამართლედ სხვადასხვა ინსტანციის საერთო სასამართლოებში. მოხარული ვართ მივიღოთ სტაჟიორთა ახალი ნაკადი. ვულოცავთ მათ კონკურენტულ შესარჩევ კონკურში გამარჯვებას. იმედი გვაქვს მომავალი 6 თვე პროდუქტიული იქნება მათი პიროვნული და კარიერული განვითარებისთვის. წარმოგიდგენთ თბილისის სააპელაციო სასამართლოს სტაჟიორების სიას: 1. ვალერი აღაპიშვილი 2. მარიამ მურვანიძე 3. ნინო გელაშვილი 4. რუსუდან გონჯილაშვილი 5. გიორგი დოლაკიძე 6. ლანა დოლიძე 7. დიმიტრი ზარქუა 8. გიორგი კრავეიშვილი 9. გიორგი მოწონელიძე 10. ანა როყვა 11. ანა სანაია 12. მამუკა სურამელი 13. გვანცა არჩვაძე 14. ბაჩი გაბაიძე 15. ნინო დარახველიძე 16. თამარ ზარიძე 17. დარიკო თურმანაული 18. მარიამ ლიპარტელიანი 19. ანა ლიპარტელიანი 20. ხატია ლობჟანიძე 21. ბაბილინა მეიფერიანი 22. სოფიო მელაშვილი 23. თათია მოსია 24. ლუიზა მსხვილიძე 25. ნანა ოდიშელიძე 26. ხატია სამხარაძე 27. ელისო სანდოძე 28. ანა ფალიანი 29. ქრისტინა ფერაძე 30. მინდია ქათამაძე 31. გიორგი ჩუბინიძე 32. ნატო ხოზბერუაშვილი 33. გიორგი სუხიტაშვილი 34. თამარ წერეთელი 35. მიხეილ წირქვაძე 36. ნინო ჭიაურელი 37. სულხან გველესიანი 38. მაია ჭიღლაძე 39. თინათინ ტიკარაძე 40. სალომე გოცირიძე 41. ლიკა ხუბულია 42. მაკა ბუიღლიშვილი 43. თეა გაბიძაშვილი 44. ლუკა თვარაძე 45. ანუკი ობოლაძე 46. თამარ სართანია 47. ხატია ხოსიაშვილი 48. თამარ კიკნაძე შეგახსენებთ, თბილისის სააპელაციო სასამართლო 2007 წლიდან მოყოლებული პერიოდულად აცხადებს სტაჟიორთა მისაღებ კონკურსს, რომელშიც მონაწილეობის მიღება იურიდიული ფაკულტეტის მე-3 და დამამთავრებელი კურსის სტუდენტებს, აგრეთვე მაგისტრატურის სტუდენტებს შეუძლიათ.
ვრცლად
ამერიკელ მოსამართლეებთან შეხვედრა
2017-02-14
14 თებერვალს, თბილისის სააპელაციო სასამართლოს აშშ-ს ჯორჯიის შტატის მოსამართლეები და სასამართლოს მენეჯერი ეწვივნენ. სტუმრებს სამოქალაქო საქმეთა პალატის მოსამართლე და იუსტიციის უმაღლესი საბჭოს წევრი თამარ ალანია შეხვდა. შეხვედრის მიზანს მოსამართლეთა უნარ-ჩვევების გაღრმავების საკითხი წარმოადგენდა. ამ კუთხით მხარეთა შორის ურთიერთთანამშრომლობის სამომავლო გეგმები დაისახა. შეხვედრა აშშ-ს საერთაშორისო ნარკოტიკებისა და კანონის აღსრულების საქმეთა ბიუროს (INL) ინიციატივით გაიმართა.
ვრცლად
34 ახალი ფორმა (სამოქალაქო საქმეებზე)
2017-01-23
თბილისის სააპელაციო სასამართლოს თავმჯდომარის ბიურო ახორციელებს სასამართლო ფორმების პროექტს. ამჯერად პროექტის ფარგლებში შეიქმნა სამოქალაქო საპროცესო კოდექსით გათვალისწინებული ყველა არასასარჩელო ფორმა (ჯამში 34). გაითვალისწინეთ, რომ შემუშავებული ფორმების გამოყენება, სამოქალაქო საპროცესო კოდექსის თანახმად, არ არის სავალდებულო და ატარებს მხოლოდ ნებაყოფლობით ხასიათს. მადლობელი ვიქნებით, თუ პროექტის მოცულობიდან გამომდინარე შესაძლოდ დაშვებული შეცდომების შესახებ შეგვატყობინებთ ონლაინ დახმარების ან ელექტრონული ფოსტის (tbappeal@court.ge) მეშვეობით. იმედი გვაქვს, წარმოდგენილი ფორმები ხელს შეუწყობს სასამართლოს ხელმისაწვდომობის ზრდას, საქმისწარმოების ხარისხის ამაღლებასა და თვითდამცველი პირებისთვის თანაბარი სასტარტო პირობების შექმნას.
ვრცლად
მენეჯმენტის სახელმძღვანელოს პრეზენტაცია
2016-12-08
1 დეკემბერს სასტუმრო რედისონ ბლუ ივერიაში გაიმართა საქართველოს საერთო სასამართლოების მოსამართლეთა და მენეჯერული პოზიციის წარმომადგენელთათვის სერთიფიკატების გადაცემა და მენეჯმენტის სახელმძღვანელოს პრეზენტაცია. სახელმძღვანელო შეიქმნა 2015 წელს განხორციელებული ხუთ ეტაპიანი ინტენსიური ტრეინინგის ფარგლებში, რომელსაც ISO სერთიფიკატის მფლობელი, გერმანიის მოხელეთა აკადემიის დირექტორი ბატონი ჰანს-იოახიმ რიგერი უძღვებოდა. ტრეინინგი გაიარა სააპელაციო სასამართლოს მოსამართლეებისა და მენეჯერული პოზიციის მქონე მონაწილეთა ჯგუფმა (12 მონაწილე). მოსამართლეთა და სასამართლოს მენეჯერთათვის შექმნილ ტრეინინგს ანალოგი არ გააჩნია. თავისი შინაარსითა და მაღალი სტანდარტებით იგი წარმოადგენდა უნიკალურ შესაძლებლობას საქართველოს საერთო სასამართლოების სისტემისათვის. ხუთ ეტაპიანი ინტენსიური სატრენინგო კურსი გამორჩეული იყო იმითაც, რომ დასაწყისიდანვე მონაწილეთა ჯგუფის ერთ-ერთ ამოცანას წარმოადგენდა, ტრენინგის დასრულების შემდგომ მათ მიერ შექმნილიყო მენეჯმენტის სახელმძღვანელო ქართულ ენაზე. წარმოგიდგენთ სწორედ ამ სახელმძღვანელოს, რომელიც, შინაარსობრივ მხარესთან ერთად, ახალ სიტყვას წარმოადგენს მისი ფორმატის თვალსაზრისით. სახელმძღვანელო შექმნილია პროგრამულ ფორმატში, რაც თითოეულ მკითხველს აძლევს შესაძლებლობას ისარგებლოს არა მხოლოდ ძიების უმარტივესი სისტემით და ცალკეულ საკითხებზე ვიდეო განმარტებებით, არამედ ასევე უნიკალურია ტექსტის ღიაობის თვალსაზრისით. თითოეული მკითხველს აქვს შესაძლებლობა მიიღოს მონაწილეობა სახელმძღვანელოს ტექსტის ფორმირებისა და სრულყოფის პროცესში. სახელმძღვანელოს შექმნაში განსაკუთრებული წვლილი მიუძღვის თბილისის სააპელაციო სასამართლოს თავმჯდომარის ბიუროს უფროსს - უჩა თოდუას. ტრეინინგის განხორციელება უზრუნველყოფილ იქნა სააპელაციო სასამართლოს თავმჯდომარის ვალერი ცერცვაძის ინიციატივით და გერმანიის საერთაშორისო თანამშრომლობის საზოგადოების (GIZ) ფინანსური მხარდაჭერით.
ვრცლად
2016 წლის შეჯამებითი ვიზიტი სააპელაციო სასამართლოში
2016-11-18
2016 წლის ბოლოს ტრადიციულად სააპელაციო სასამართლოში შედგა შეჯამებითი ვიზიტი დრეზდენის უმაღლესი სამხარეო სასამართლოსა და ვროცლავის სააპელაციო სასამართლოს მოსამართლეთა მონაწილეობით, რომლესაც სააპელაციო სასამართლოს თავმჯდომარემ ვალერი ცერცვაძემ უმასპინძლა. კიდევ ერთი წარმატებული წელი შეემატა 2012 წელს დაწყებულ თანამშრომლობას. ამ წლის განმავლობაშიც არაერთი საინტერესო და ნაყოფიერი ვიზიტი განხორციელდა გერმანიის სამართლებრივი თანამშრომლობის საზოგადოების - GIZ-ის მხარდაჭერით და მხარეთა აქტიური ინიციატივებით. ნოემბრის შეჯამებითი ვიზიტის ფარგლებში დაისახა მომავალი წლის თანამშრომლობის მიმართულებები და გეგმები. მხარეები კვლავ მოწოდებული არიან გააგრძელონ აქტიური თანამშრომლობა, რომლის ფარგლებშიც არაერთ ქართველ მოსამართლეს ეძლევა უნიკალური შესაძლებლობა, სამუშაო შეხვედრებზე მეგობრული ატმოსფეროს და კვალიფიციური კოლეგების თანხლებით განიხილოს სამოქალაქო სამართალწარმოებისათვის აქტუალური საკითხები.
ვრცლად
ლატვიის დელეგაციის ვიზიტი
2016-10-28
თბილისის სააპელაციო სასამართლოში შედგა ლატვიის მოსამართლეთა და იუსტიციის სფეროს მოხელეთა დელეგაციის ვიზიტი. ვიზიტის ფარგლებში თბილისის სააპელაციო სასამართლოს წარმომადგენლებმა სტუმრებს გააცნეს სასამართლოს ინიციატიცით შექმნილი რამდენიმე ელექტრონული პროგრამა: ● საქართველოს სასამართლოების შიდა საინფორმაციო ვებ-გვერდი (ინტრანეტი) ● ადამიანური რესურსების მართვის (HR) პროგრამა ● სამართლის ელექტრონული ბიბლიოთეკა (სები)საჯარო ინფორმაციის პროგრამასახელმწიფო ბაჟის გამოთვლის პროგრამაუფასო იურიდიული დახმარების პორტალიახალგაზრდული სასამართლოს პორტალიპროექტი - სასამართლო მაუწყებელი ● პროექტი - მენეჯერი ვიზიტის ბოლოს სტუმრებმა დაათვალიერეს სასამართლოს შენობა და დაესწრნენ პროცესს მე-12 სხდომის დარბაზში.
ვრცლად
თბილისის სააპელაციო სასამართლოს 23 გერმანელი მოსამართლე სტუმრობდა
2016-10-17
თბილისის სააპელაციო სასამართლოში გაცნობითი ხასიათის ვიზიტით იმყოფებოდა გერმანელი მოსამართლეების ჯგუფი. სტუმრებს სასამართლოს თავმჯდომარე - ვალერი ცერცვაძემ და ქართველმა მოსამართლეებმა უმასპინძლეს. საქართველოს საერთო სასამართლოების სისტემის შესახებ ზოგადი ინფორმაციის მიწოდების შემდეგ შეხვედრა კითხვა-პასუხის რეჟიმში წარიმართა. სტუმრებმა დიდი ინტერესი გამოიჩინეს იუსტიციის უმაღლესი საბჭოსა და მოსამართლეთა დანიშვნის წესის, საქმეთა განაწილებისა და მოსამართლეთა საქმიანობის შეფასების ქართული მოდელების მიმართ.
ვრცლად
პერსონალური კომპიუტერები მხარეებისა და მათი წარმომადგენლებისათვის
2016-08-04
იუსტიციის სამინისტროს სსიპ – საქართველოს საკანონმდებლო მაცნეს, თბილისის სააპელაციო სასამართლოსა და სსიპ – საერთო სასამართლოების დეპარტამენტს შორის ურთიერთთანამშრომლობის მემორანდუმი გაფორმდა. მემორანდუმს, რომელიც სასამართლო სხდომის დარბაზებში საკანონმდებლო მაცნეს სერვისების ხელმისაწვდომობას უზრუნველყოფს, 29 ივლისს ხელი მოაწერეს საქართველოს საკანონმდებლო მაცნეს თავმჯდომარის მოვალეობის შემსრულებელმა ნიკა ახალბედაშვილმა, სააპელაციო სასამართლოს მენეჯერმა გიორგი კოპალიანმა და საერთო სასამართლოების დეპარტამენტის თავმჯდომარემ შოთა ქარჩავამ. ხელმოწერის ცერემონია თბილისის სააპელაციო სასამართლოში გაიმართა. მემორანდუმის ფარგლებში საქართველოს საკანონმდებლო მაცნე თბილისის სააპელაციო სასამართლოს 21 სხდომის დარბაზში, საქმის გასაცნობ ოთახში და მოქალაქეთა მისაღებში, ყოველგვარი საფასურის გადახდის გარეშე, განათავსებს უწყვეტი კვების წყაროთი აღჭურვილ 67 პერსონალურ კომპიუტერს. პროექტის მიზანია მართლმსაჯულების განხორციელების ხელშეწყობა და სამართალწარმოების მონაწილე მხარეთათვის ქართული ნორმატიული ბაზის მაქსიმალური ხელმისაწვდომობის უზრუნველყოფა. საკანონმდებლო მაცნე მომხმარებელს სთავაზობს ოფიციალური იურიდიული ძალის მქონე ნორმატიული აქტების მუდმივად განახლებად, სრულყოფილ მონაცემთა ბაზას, რომელიც მოიცავს ქვეყანაში მოქმედ ყველა ნორმატიულ აქტს. ნორმატიული აქტების საძიებო სისტემაში მომხმარებელს შეუძლია იხილოს კოდიფიცირებული აქტები და მათი ისტორია განხორციელებული ცვლილებების ყველა სტადიაზე. აღნიშნულ პროექტს საქართველოს საკანონმდებლო მაცნე საკუთარი შემოსავლებიდან სრულად აფინანსებს. პროექტის სავარაუდო ღირებულება 117 383 ლარია. ანალოგიური პროექტი გასულ წელსაც განხორციელდა, რომლის ფარგლებშიც საკანონმდებლო მაცნემ თბილისის საქალაქო სასამართლოს 43 სხდომათა დარბაზში 129 პერსონალური კომპიუტერი განათავსა, რისთვისაც საკანონმდებლო მაცნეს საკუთარი სახსრებიდან 176 270 ლარი გამოიყო.
ვრცლად
გაიღე სისხლი სიცოცხლის გადასარჩენად
2016-08-02
თბილისის სააპელაციო სასამართლო ჩაერთო სისხლის ცენტრალური ბანკის უანგარო დონაციის აქციაში - "გაიღე სისხლი სიცოცხლის გადასარჩენად". როგორც მოგეხსენებათ, ისეთი შემთხვევების დროს, როგორიცაა: ავტოავარია, მშობიარობა, ონკოლოგიური დაავადებები, კარდიოქირურგიული ოპერაციები და სხვა - გადაუდებელ აუცილებლობას წარმოადგენს პაციენტისთვის სისხლის გადასხმა. ავადმყოფს, პრაქტიკულად ყოველდღიურად სჭირდება ახალი სისხლისგან დამზადებული კომპონენტები. თუმცა, ახალი სისხლი მუდმივად დეფიციტურია, რადგან დონორთა შეზღუდული რაოდენობა, ვერ აკმაყოფილებს მზარდ მოთხოვნებს. ეს დიდ საფრთხეს უქმნის უმწეო მდგომარეობაში მყოფ ჩვენს თანამოქალაქეთა ჯანმრთელობას და სიცოცხლეს. სწორედ ამ დეფიციტის აღმოსაფხვრელად, სისხლის ცენტრალური ბანკი რეგულარულად აწყობს აქციას "გაიღე სისხლი სიცოცხლის გადასარჩენად". აქციის მიზანია სხვადასხვა დაავადებების დროს საჭირო სისხლის მარაგის შექმნა. ღონისძიება, თავისი არსით, ატარებს სრულიად უანგარო ხასიათს: როგორც სისხლის დონაცია, ისე შემდეგ მისი საჭიროებისამებრ გამოყენება ხდება სრულიად უსასყიდლოდ. თბილისის სააპელაციო სასამართლო მადლობას უხდის მოსამართლეებსა და სასამართლოს მოხელეებს აქციაში მონაწილეობისთვის.
ვრცლად
მოსამართლეობის კანდიდატთა კენჭისყრის შედეგები
2016-07-15
იუსტიციის უმაღლესი საბჭოს 2016 წლის 14 ივლისის სხდომაზე მოსამართლეობის კანდიდატთა კენჭისყრის შედეგად არჩეულ იქნა 44 მოსამართლე. მათგან 21 მოქმედი მოსამართლე, 9 იუსტიციის უმაღლესი სკოლის ყოფილი მსმენელი და 14 ყოფილი მოსამართლეა. კონკურსი გამოცხადებული იყო 65 ვაკანსიაზე და მასში მონაწილეობას 122 კანდიდატი იღებდა. თანამდებობაზე დაინიშნენ: 1. თბილისის სააპელაციო სასამართლოს ადმინისტრაციულ საქმეთა პალატა - გიორგი გოგიაშვილი, ირაკლი შენგელია, მირანდა ერემაძე. 2. თბილისის სააპელაციო სასამართლოს სამოქალაქო საქმეთა პალატა - თამარ ალანია, გოგიტა თოთოსაშვილი, თეა სოხაშვილი-ნიკოლაიშვილი, ვანო წიკლაური, დიანა ბერეკაშვილი. 3. თბილისის სააპელაციო სასამართლოს სისხლის სამართლის საქმეთა პალატა - მაია თეთრაული, მარინა ხოლოაშვილი. 4. თბილისის სააპელაციო სასამართლოს საგამოძიებო კოლეგია - მერაბ გაბინაშვილი. 5. ქუთაისის სააპელაციო სასამართლოს სამოქალაქო საქმეთა პალატა - დიმიტრი გვრიტიშვილი, სიმონ ჩხაიძე. 6. ქუთაისის სააპელაციო სასამართლოს სისხლის სამართლის საქმეთა პალატა - მაკა გორგოძე. 7. თბილისის საქალაქო სასამართლოს ადმინისტრაციულ საქმეთა კოლეგია - ივანე აღნიაშვილი, ნანა ჭიჭილეიშვილი. 8. თბილისის საქალაქო სასამართლოს საგამოძიებო და წინასასამართლო სხდომის კოლეგია - მაკა გველესიანი, ლელა კალიჩენკო, გიორგი კერატიშვილი. 9. თბილისის საქალაქო სასამართლოს სამოქალაქო საქმეთა კოლეგია - თამარ ბურჯანაძე, გიორგი გოგიჩაშვილი, ვლადიმერ კაკაბაძე, ქეთევან კუჭავა, ლევან მიქაბერიძე, ნათია შიოშვილი, თამარ ჩიხლაძე, შორენა წიქარიძე, მაკა ჭედია, ელისო ტუკვაძე. 10. თბილისის საქალაქო სასამართლოს სისხლის სამართლის საქმეთა კოლეგია - ეკატერინე გაბრიჩიძე, ნათია გუდაძე, ლავრენტი მაღლაკელიძე. 11. ბათუმის საქალაქო სასამართლოს სამოქალაქო საქმეთა კოლეგია - დავით მამისეიშვილი. 12. ქუთაისის საქალაქო სასამართლოს სამოქალაქო საქმეთა კოლეგია - გოჩა დიდავა. 13. ქუთაისის საქალაქო სასამართლოს მაგისტრატი მოსამართლე ბაღდათის მუნიციპალიტეტში - მანანა ნიკაჭაძე. 14. გურჯაანის რაიონული სასამართლო - დევი დევიძე. 15. ზუგდიდის რაიონული სასამართლო - ირაკლი აბშილავა, დავით გელაშვილი. 16. თელავის რაიონული სასამართლო - ზვიად შარაძე. 17. მცხეთის რაიონული სასამართლოს ადმინისტრაციულ საქმეთა კოლეგია - ვასილ მშვენიერაძე. 18. რუსთავის საქალაქო სასამართლოს სამოქალაქო საქმეთა კოლეგია - ეკატერინე ყანჩელი. 19. რუსთავის საქალაქო სასამართლოს სისხლის სამართლის საქმეთა კოლეგია - მამია ფხაკაძე. 20. რუსთავის საქალაქო სასამართლოს მაგისტრატი მოსამართლე გარდაბნის მუნიციპალიტეტში - ირინე ტყეშელაშვილი. 21. სამტრედიის რაიონული სასამართლო - ლევან მეშველიანი.
ვრცლად
კონფერენციამ ვალერი ცერცვაძე იუსტიციის უმაღლესი სკოლის დამოუკიდებელი საბჭოს თავმჯდომარედ აირჩია
2016-07-13
2016 წლის 9 ივლისს, საქართველოს საერთო სასამართლოების მოსამართლეთა XVIII რიგგარეშე კონფერენციაზე საქართველოს იუსტიციის უმაღლესი სკოლის დამოუკიდებელი საბჭოს თავმჯდომარედ აირჩიეს თბილისის სააპელაციო სასამართლოს თავმჯდომარე - ვალერი ცერცვაძე. იუსტიციის უმაღლესი სკოლის დამოუკიდებელი საბჭო განსაზღვრავს სკოლის საქმიანობის მიმართულებებს, კოორდინაციას უწევს და ზედამხედველობს მათ აღსრულებას. იუსტიციის უმაღლესი სკოლის დანიშნულებაა საქართველოს საერთო სასამართლოების სისტემაში მოსამართლედ დასანიშნი პირის – იუსტიციის მსმენელის პროფესიული მომზადება. სკოლის მიზანია, უზრუნველყოს იუსტიციის მსმენელის თეორიული ცოდნის გაღრმავება და პრაქტიკული მუშაობისათვის აუცილებელი უნარ-ჩვევების გამომუშავება, აგრეთვე იუსტიციის მსმენელის მიერ მომავალი პასუხისმგებლობისა და კანონით დადგენილ ფარგლებში მოქმედების თავისუფლების შეცნობა, ხელი შეუწყოს იუსტიციის მსმენელის თანდათანობით ინტეგრაციას იმ სოციალურ გარემოში, რომელშიც მას, როგორც მოსამართლეს, მომავალში მოუწევს საქმიანობა. სკოლის დანიშნულებაა ასევე მოქმედი მოსამართლის პროფესიული სრულყოფისათვის მისი გადამზადება, აგრეთვე საქართველოს საერთო სასამართლოების სისტემის მაღალკვალიფიციური სპეციალისტებით დასაკომპლექტებლად მოსამართლის თანაშემწეობის კანდიდატისა და სხვა სპეციალისტების მომზადება-გადამზადება.
ვრცლად
განცხადება რუსთავი2-ის საქმესთან დაკავშირებით
2016-06-23
თბილისის სააპელაციო სასამართლო ეხმაურება ტელეკომპანია ,,რუსთავი 2“-ის გენერალური დირექტორის მიერ გაკეთებულ განცხადებას და განვმარტავთ შემდეგს: სამოქალაქო საპროცესო კოდექსის 257-ე მუხლის მე-2 ნაწილის თანახმად, სარეზოლუციო ნაწილის გამოცხადებიდან 14 დღის ვადაში სასამართლო ვალდებულია მოამზადოს დასაბუთებული გადაწყვეტილება მხარეებისთვის გადასაცემად. აღნიშნული ვალდებულება სააპელაციო სასამართლოს კოლეგიამ შეასრულა 12 დღის ვადაში, რითაც სრულად დაიცვა კანონის მითითებული მოთხოვნა. 2591-ე მუხლი, რომელზეც მხარის მიერ ხდება მითითება, წარმოადგენს სპეციალურ მუხლს, სადაც განსაზღვრულია მხარის მხოლოდ ვალდებულება გამოცხადდეს სასამართლოში არაუადრეს 21 და არაუგვიანეს 30 დღისა გადაწყვეტილების ჩასაბარებლად და თუ იგი თავს აარიდებს ამ მოვალეობას გადაწყვეტილება ჩაითვლება ჩაბარებულად და დაიწყება ვადის ათვლა 30 დღიდან. 2591-ე მუხლის მე-2 ნაწილი იმპერატიულად ადგენს თუ რა კატეგორიის მხარეებთან მიმართებაშია ვალდებული სასამართლო გაუგზავნოს სასამართლო გადაწყვეტილება, რაც არანაირად არ გამორიცხავს სასამართლოს უფლებას საკუთარი შეხედულებისამებრ გაუგზავნოს ნებისმიერ სხვა მხარეს, მით უფრო თუ იგი 21 დღეზე ადრე იქნა მომზადებული. ამასთან, კანონში არ არსებობს ამკრძალავი ნორმა, რომელიც მოსამართლეს უზღუდავს უფლებას გაუგზავნოს კორესპონდენციები მხარეებს მათ შორის სასამართლო გადაწყვეტილება. განსაკუთრებით გვინდა ხაზი გავუსვათ იმ გარემოებას, რომ საკასაციო საჩივრის შეტანის ვადა კანონით განსაზღვრულია 21 დღით და მისი დინება იწყება გადაწყვეტილების მხარისათვის გადაცემიდან ან იმ მომენტიდან, როდესაც მოსამართლე გამოაცხადებს დასაბუთებულ გადაწყვეტილებას და ამას ესწრება მხარე. ორივე შემთხვევაში ფუნდამენტალური ღირებულებაა მხარეს ჰქონდეს 21 დღე მას შემდეგ, როდესაც დასაბუთებულ გადაწყვეტილებას გაეცნობა, რაც მოცემულ შემთხვევაში არ დარღვეულა. შესაბამისად აბსურდულია იმის მტკიცება, რომ მხარეებს გასაჩივრების ვადის დინება ეწყებათ სარეზოლუციო ნაწილის გამოცხადებიდან 30-ე დღეს, მაშინ როდესაც დასაბუთებული გადაწყვეტილების გამოცხადებიდან მათ აქვთ 21 დღე, რაც შეიძლება მოსამართლის დისკრეციით განხორციელდეს საქმის განხილვის დასრულებიდან ნებისმიერ გონივრულ დროს და აქედან დაიწყოს ვადის ათვლა. რაც შეეხება 70-78 მუხლებით დადგენილ წესს, გვინდა საზოგადოებას ვაუწყოთ, რომ ტელეკომპანია ,,საქართველო“ არ იმყოფებოდა საქმეში მითითებულ მისამართზე; მისმა ყველა წარმომადგენელმა (პირადად და/ან ოფისის წარმომადგენლების მიერ) უარი განაცხადა სასამართლო გადაწყვეტილების ჩაბარებაზე, რაც 75-ე მუხლის პირველი ნაწილისა და 76-ე მუხლების შესაბამისად ითვლება არასაპატიოდ და/ან წარმოადგენს უარის თქმას. ასევე აღვნიშნავთ, რომ საერთაშორისოდ აღიარებული პრინციპებიდან გამომდინარე განსაკუთრებული მნიშვნელობა ენიჭება მართლმსაჯულების ეფექტურობას და ნებისმიერ შემთხვევაში, როდესაც სასამართლო საკუთარ ვალდებულებებს ასრულებს კანონით განსაზღვრულ ვადებში და არ აჭიანურებს პროცესს, ფასდება ყოველთვის სასამართლოს პოზიტივად და სრულიად უსაფუძვლოა იმის მცდელობა, რომ აღნიშნული შეფასდეს, როგორც სასამართლოს გაუმართლებელი ქმედება. ყოველივე ზემოაღნიშნულიდან გამომდინარე კიდევ ერთხელ განვმარტავთ, რომ სასამართლო მოცემულ შემთხვევაში მოქმედებდა საკუთარი დისკრეციის ფარგლებში, კანონმდებლობის მოთხოვნების სრული დაცვით და ყოველგვარი საუბარი, რომ სააპელაციო სასამართლოს კოლეგიის ქმედება გასულია კანონის ჩარჩოებიდან, არ შეესაბამება სინამდვილეს და მიზნად ისახავს სასამართლოს დისკრედიტაციასა და საზოგადოების შეცდომაში შეყვანას.
ვრცლად
თბილისის სააპელაციო სასამართლოს განცხადება რუსთავი2-ის საქმესთან დაკავშირებით
2016-06-09
თბილისის სააპელაციო სასამართლო ეხმაურება ტელეკომპანია ,,რუსთვი2“-ის მიერ გავრცელებულ ინფორმაციას მოსამართლე შორენა ყაველაშვილის მიერ სამოქალაქო საქმეთა განხილვის უფლებამოსილებასთან დაკავშირებით და განმარტავს, რომ ხსენებული განცხადება არ შეესაბამება სინამდვილეს და მასში ინფორმაცია არ არის სრულყოფილად მითითებული. კერძოდ, მოსამართლე შორენა ყაველაშვილს იუსტიციის უმაღლეს სკოლაში გავლილი აქვს სამოქალაქო სამართლის სრული 18 თვიანი კურსი და შესაბამისად წარმატებით აქვს ჩაბარებული გამოცდები, რითაც დასტურდება მისი უნარები სამოქალაქო სამართალში. გარდა ამისა, მოსამართლე შორენა ყაველაშვილი წლების განმავლობაში სამოსამართლეო საქმიანობას ახორციელებს სწორედ სამოქალაქო სამართლის მიმართულებით და განხილული აქვს 1000- ზე მეტი სამოქალაქო საქმე. რაც შეეხება იმ გარემოებას, რომ მას საკვალიფიკაციო გამოცდა ჩაბარებული აქვს სისხლის სამართლის სპეციალობით, განვმარტავთ, რომ მოქმედ კანონმდებლობაში არ არსებობს არავითარი შეზღუდვა მოსამართლემ განიხილოს სხვა სპეციალობის საქმე. მოსამართლე შორენა ყაველაშვილის მონაწილეობა რუსთავი 2-ის საქმის განხილვაში სრულ შესაბამისობაშია საქართველოს კანონმდებლობის მოთხოვნებთან. გარდა ამისა, იმის გათვალისწინებით, რომ სასამართლოები ხშირად განიცდიან მოსამართლეთა სიმცირეს, აღნიშნული პრაქტიკა წლების მანძილზე გამოიყენება სამივე ინსტანციის სასამართლოებში და წარმოადგენს, ფაქტიურად ერთადერთ საშუალებას თავიდან იქნას აცილებული საქმეთა განხილვის მნიშვნელოვანი გაჭიანურება. ყოველივე ზემოაღნიშნულის გათვალისწინებით, კიდევ ერთხელ აღვნიშნავთ, რომ აბსოლუტურად უსაფუძვლოა მოსაზრება იმის თაობაზე, რომ სააპელაციო სასამართლოში რუსთავი 2-ის საქმის განხილვაში მონაწილეობის უფლება არ ჰქონდა მოსამართლე შორენა ყაველაშვილს და მოვუწოდებთ ყველას თავი შეიკავოს იმგვარი ინფორმაციის გავრცელებისგან, რომელიც ხელს შეუწყობს საზოგადოების შეცდომაში შეყვანას.
ვრცლად
საქართველოს იუსტიციის უმაღლესი საბჭოს განცხადება
2016-06-02
საქართველოს იუსტიციის უმაღლესი საბჭო მაღალი საზოგადოებრივი ინტერესის გათვალისწინებით ეხმაურება ბოლო პერიოდში სასამართლოსა და მოსამართლეების მიმართ გამოთქმულ უსაფუძვლო ბრალდებებსა და უპრეცედენტო ზეწოლის ფაქტებს. იუსტიციის უმაღლესი საბჭო განმარტავს, რომ ბრალდება მოსამართლე ნათია გუჯაბიძის მიერ სახელმწიფო თანხების გაფლანგვის შესახებ სიმართლეს არ შეესაბამება. იუსტიციის უმაღლესი საბჭო აღნიშნავს, რომ სსიპ საერთო სასამართლოების დეპარტამენტი უზრუნველყოფს მოსამართლეების საცხოვრებელი ფართის ქირავნობის ხარჯებს „საერთო სასამართლოების შესახებ“ საქართველოს ორგანული კანონის შესაბამისად. მოსამართლეს, რომელსაც სამოსამართლო უფლებამოსილების განსახორციელებლად თვითმმართველ ქალაქში პირად საკუთრებაში არ აქვს საცხოვრებელი ბინა, სახელმწიფო უზრუნველყოფს აუცილებელი საცხოვრებელი ფართობით ან უნაზღაურებს საამისოდ საჭირო ხარჯებს. საბჭო განმარტავს, რომ მთელი სამოსამართლო კარიერის მანძილზე ნათია გუჯაბიძის მიმართ არასდროს გამოყენებულა დისციპლინური სახდელი ან ზემოქმედების ღონისძიება (სარეკომენდაციო ბარათის ჩათვლით) რაიმე დისციპლინური გადაცდომისათვის. ასევე, საბჭოს არასდროს მიუმართავს პროკურატურის ორგანოებისათვის მის წინააღმდეგ სისხლისსამართლებრივი გამოძიების დაწყების წინადადებით. ზემოაღნიშნულ განცხადებებს საბჭო აფასებს, როგორც მოსამართლის მიმართ უსაფუძვლო ბრალდების წაყენებას, რაც მოსამართლის დემორალიზაციას, და ამ გზით, სასამართლოზე ზეწოლის მოხდენის მიზანს ემსახურება. საქართველოს იუსტიციის უმაღლესი საბჭო უკიდურესად შეშფოთებულია და დაუშვებლად მიიჩნევს სასამართლო კორპუსის და მოსამართლის მიმართ ნებისმიერ ისეთ საჯარო განცხადებას, რომელიც აშკარად შეურაცხყოფს სასამართლოს პრესტიჟსა და ავტორიტეტს. საქართველოს კონსტიტუციის შესაბამისად, მოსამართლე დამოუკიდებელია თავის საქმიანობაში და ემორჩილება მხოლოდ კონსტიტუციასა და კანონს. ამასთან ერთად, აკრძალულია ნებისმიერი ფორმით, პირდაპირი ან არაპირდაპირი ზეწოლა მოსამართლეზე, ან ჩარევა მის საქმიანობაში, გადაწყვეტილების მიღებაზე ზეგავლენის მიზნით. იუსტიციის უმაღლესი საბჭო მოუწოდებს ყველას, პატივი სცენ სასამართლოსა და ინიდივიდუალური მოსამართლეების დამოუკიდებლობას, შეწყვიტონ სასამართლოს დისკრედიტაციის მცდელობა და არ გაავრცელონ ისეთი განცხადებები, რომლებიც მიმართული იქნება საზოგადოების შეცდომაში შეყვანის ან სასამართლოსა და მოსამართლის ავტორიტეტის ხელყოფისაკენ. იუსტიციის უმაღლესი საბჭო მოითხოვს, რომ სასამართლოს მიეცეს ნორმალურ და მშვიდ გარემოში მართლმსაჯულების განხორციელების შესაძლებლობა. ყოველივე ზემოაღნიშნულის გათვალისწინებით, იუსტიციის უმაღლესი საბჭო ყველა დაინტერესებულ პირს მოუწოდებს, თავი შეიკავოს სასამართლოს მიერ გადაწყვეტილების მიღებამდე შეფასებებისა და უსაფუძვლო კრიტიკისგან. აუცილებელია მოსამართლეებს მიეცეს პროცესის მშვიდ გარემოში წარმართვის საშუალება, რათა უზრუნველყოფილ იქნას საქმის სრულყოფილი და ყოველმხრივი გამოკვლევა, რაც აუცილებელია ობიექტური და კანონიერი გადაწყვეტილების მისაღებად.
ვრცლად
თბილისის სააპელაციო სასამართლოს განცხადება
2016-05-31
მაღალი საზოგადოებრივი ინტერესიდან გამომდინარე, თბილისის სააპელაციო სასამართლო მნიშვნელოვნად მიიჩნევს განმარტოს ტელეკომპანია რუსთავი 2-ის საქმის მომხსენებელი მოსამართლის განსაზღვრის საკითხი. პირველ რიგში, გვინდა ერთმნიშვნელოვნად განვმარტოთ, რომ ტელეკომპანია რუსთავი 2-ის საქმის სხვა მომხსენებელი მოსამართლისთვის გადაწერა განხორციელდა მხოლოდ ერთხელ და არ შეესაბამება სინამდვილეს გავრცელებული ხმები ამგვარი ცვლილების სამჯერ ან მეტად განხორციელებასთან დაკავშირებით. კერძოდ, ტელეკომპანია რუსთავი 2-ის საქმე თბილისის სააპელაციო სასამართლოში შემოვიდა 2015 წლის 28 დეკემბერს და დაეწერა მოსამართლე ლილი ტყემალაძეს. 2016 წლის 15 მარტს მოსამართლე ლილი ტყემალაძის მოხსენებითი ბარათის საფუძველზე, ჯანმრთელობის მდგომარეობის მკვეთრად გაუარესების მიზეზით, აღნიშნული და მოსამართლის განხილვაში არსებული სხვა საქმეები, მათი განხილვის გაჭიანურების თავიდან აცილების მიზნით, გადაეცა სასამართლოს კანცელარიას ხელახალი განაწილებისათვის. აღნიშნულის შედეგად ტელეკომპანია რუსთავი 2-ის საქმე დაეწერა მოსამართლე ნატალია ნაზღაიძეს. აქვე განვმარტავთ, რომ სასამართლოს კანცელარია სამოქალაქო საქმეებს ანაწილებს ,,საერთო სასამართლოებში საქმეთა განაწილებისა და უფლებამოსილების სხვა მოსამართლისათვის დაკისრების წესის შესახებ’’ საქართველოს კანონის შესაბამისად, საქმეთა შემოსვლის რიგისა და მოსამართლეთა რიგითობის მიხედვით. როგორც მოსამართლე ლილი ტყემალაძეზე, ასევე მოგვიანებით მოსამართლე ნატალია ნაზღაიძეზე ტელეკომპანია რუსთავი 2-ის საქმის განაწილება განხორციელდა აღნიშნული კანონის მოთხოვნათა სრული დაცვით. განსაკუთრებით გვინდა გამოვეხმაუროთ უკანასკნელ პერიოდში ტელეკომპანია რუსთავი 2-ის საქმის განმხილველი მოსამართლეების მიმართ გაკეთებულ დაუსაბუთებელ და შეურაცხმყოფელ განცხადებებს. სასამართლო მიიჩნევს, რომ ადგილი აქვს არა მხოლოდ მოსამართლეთა პროფესიულ და პიროვნულ შეურაცხოფას, არამედ საფუძველი გვაქვს ვივარაუდოთ, რომ სახეზეა სასამართლოს საქმიანობაზე გავლენის მოხდენისა და ზეწოლის კონკრეტული ნიშნები. საქართველოს კანონმდებლობის შესაბამისად, მოსამართლე დამოუკიდებელია თავის საქმიანობაში და ემორჩილება მხოლოდ კონსტიტუციასა და კანონს. ამასთან ერთად, აკრძალულია ნებისმიერი ფორმით, პირდაპირი ან არაპირდაპირი ზეწოლა მოსამართლეზე, ან ჩარევა მის საქმიანობაში, მიუხედავად იმისა, თუ ვისგან მომდინარეობს ამგვარი ზეგავლენის მცდელობა. მოვუწოდებთ ყველას, პატივი სცენ სასამართლოსა და ინიდივიდუალური მოსამართლეების დამოუკიდებლობას და თავი შეიკავონ იმგვარი განცხადებების გავრცელებისგან, რომლებიც მიმართული იქნება საზოგადოების შეცდომაში შეყვანის ან სასამართლოსა და მოსამართლის ავტორიტეტის ხელყოფისაკენ. საქმეზე არსებული მაღალი საჯარო ინტერესის გათვალისწინებით განსაკუთრებით მნიშვნელოვანია მოსამართლეებს მიეცეთ პროცესის მშვიდ გარემოში წარმართვის საშუალება, რათა უზრუნველყოფილ იქნას საქმის სრულყოფილი და ყოველმხრივი გამოკვლევა, რაც აუცილებელია ობიექტური და კანონიერი გადაწყვეტილების მისაღებად. გამომდინარე იქიდან, რომ მოსამართლე არაა უფლებამოსილი ჩაერთოს კონკრეტულ საქმესთან დაკავშირებით მიმდინარე საჯარო დებატებში, კიდევ უფრო დიდი მნიშვნელობა ენიჭება ყველას პასუხისმგებლობას ─ განსაკუთრებული სიფრთხილით მოეკიდოს მართლმსაჯულების განხორციელების პროცესის შეფასებას. შესაბამისად, მოგიწოდებთ თავი შეიკავოთ იმგვარი ქმედებების განხორციელებისა ან განცხადებების გაკეთებისაგან, რომლებიც შესაძლებელია აღქმულ იქნეს მოსამართლეთა საქმიანობაში ჩარევის მცდელობად და ხელს შეუშლის სამართალწარმოების სრულყოფილად განხორციელებას.
ვრცლად
ჰამბურგის სისხლის სამართლის მოსამართლეთა ვიზიტი
2016-04-28
მორიგი სამუშაო ვიზიტი შედგა თბილისის სააპელაციო სასამართლოში ამ წლის 26-28 აპრილს. ვიზიტად იმყოფებოდნენ ჰამბურგის პირველი და მეორე ინსტანციების გაერთიანებული სასამართლოს პრეზიდენტი ქალბატონი სიბილე უმლაუფი და სისხლის სამართლის პალატის მოსამართლეები. დელეგაციას თბილისის სააპელაციო სასამართლოს სისხლის სამართლის საქმეთა პალატის მოსამართლეებმა ბატონი ვალერი ცერცვაძის ხელმძღვანელობით უმასპინძლეს. შედგა არაერთი საინტერესო და ნაყოფიერი დისკუსია ქართული სისხლის სამართლის მართლმსაჯულებისათბვის აქტუალურ პრობლემატიკაზე. უკვე მეორე წელია სასამართლოებს შორის მიმდინარეობს თანამშრომლობა სისხლის სამართლის მიმართულებით, რასაც ხელს უწყობს და აქტიურად მხარს უჭერს საერთაშორისო თანამშრომლობის საზოგადოება (IRZ). განხორციელებული ვიზიტი მიეძღვნა სისხლის სამართლის სამართალწარმოებაში ირიბი ჩვენების მნიშვნელობას და გამოყენების პრობლემატიკას. ქართველ მოსამართლეებს შესაძლებლობა ჰქონდათ მოესმინათ გერმანული რეგულაციებისა და სასამართლოს მიდგომების შესახებ მტკიცების სტანდარტან დაკავშირებით. განხილვის თემა იყო ასევე გადაწყვეტილებათა გადასინჯვის წინაპირობები და წესი. მხარეებმა ასევე ერთმანეთს გაუზიარეს გამოცდილება ოპერატიულ სამძებრო ინფორმაციის საფუძველზე განხორციელებულ საგამოძიებო მოქმედებათა კანონიერების შემოწმებისას სასამართლოს როლისა და გადაწყვეტილებების თაობაზე. სააპელაციო სასამართლო მადლობას უხდის IRZ-ს მხარდაჭერისათვის და ქართველი მოსამართლეთათვის მიცემული შესაძლებლობისთვის, უშუალოდ შეხვდნენ და გაუზიარონ გამოცდილება გერმანელ კოლეგებს. იმედს გამოვთქვამთ, დაწყებული თანამშრომლობა კიდევ უფრო აქტიურად და ინტენსიურად გაგრძელდება.
ვრცლად
გერმანელ მოსამართლეთა დელეგაციის ვიზიტი თბილისის სააპელაციო სასამართლოში
2016-04-18
12-15 აპრილს თბილისის სააპელაციო სასამართლომ უმასპინძლა დრეზდენის უმაღლესი სამხარეო სასამართლოს (OLG) მოსამართლეთა დელეგაციის პირველ სამუშაო ვიზიტს 2016 წლისთვის. თბილისის სააპელაციო სასამართლოსა და დრეზდენის უმაღლეს სამსახარეო სასამართლოს შორის თანამშრომლობა, რომელიც გერმანიის საერთაშორისო თანამშრომლობის საზოგადოების (GIZ) დახმარებითა და ხელშეწყობით ჩამოყალიბდა, უკვე წლებს ითვლის. სწორედ ამ ხანგრძლივი და წარმატებული თანამშრომლობის შედეგი იყო მოსამართლეთა დელეგაციასთან ერთად საქსონიის მხარის იუსტიციის სახელმწიფო მინისტრის ვიზიტი საქართველოში. ბატონ სებასტიან გემკოვს შეხვედრები ჰქონდა სააპელაციო სასამართლოს თავმჯდომარესთან ბატონ ვალერი ცერცვაძესთან და საქართველოს იუსტიციის სფეროს წარმომადგენლებთან. მოსამართლეთა დელეგაციის პროგრამის ფარგლებში, მსჯელობის და განხილვის საგანი გახდა ქართული მართლმსაჯულებისათვის აქტუალური და პრობლემატური საკითხები, რომლებიც, ისევე როგორც წინა შეხვედრებისას, თბილისის სააპელაციო სასამართლოს სამოქალაქო საქმეთა პალატის მოსამართლეების მიერ იქნა დასახელებული. ამჯერად ვიზიტი მიეძღვნა საკორპორაციო სამართლის პრაქტიკულ პრობლემებს. მოსამართლეებმა იმსჯელეს ისეთ აქტუალურ თემებზე როგორიცაა, დირექტორის შიდაკორპორაციული პასუხისმგებლობის საფუძვლები (მოვალეობის არასათანადოდ შესრულების გამო, სხვა თანამშრომელთა ბრალეული ქმედების გამო და არასათანადო მოგების გამო), კაპიტალური ტიპის საზოგადოებებში გამჭოლი პასუხისმგებლობის წინაპირობები და ა.შ. საკორპორაციო სამართლის თემებთან ერთად, ერთი სამუშაო სესია დაეთმო უსაფუძვლო გამდიდრების სამართლის ქართული სასამართლო პრაქტიკისთვის აქტუალურ საკითხებზე გერმანული გამოცდილების გაზიარებას. იმის გათვალისწინებით, რომ საქართველოს კანონმდებლობა კერძო სამართლის სფეროში ემყარება და მნიშვნელოვნად რეცეფცირებულია გერმანული სამართლიდან, შეუფასებლად მნიშვნელოვანია და ნაყოფიერია ქართველი მოსამართლეებისთვის უკვე ტრადიციად ქცეული შესაძლებლობა, უშუალოდ შეძლონ აქტუალური სამართლებრივი საკითხების განხილვა და ურთიერთგაზიარება გერმანელ კოლეგებთან ერთად და გერმანიის სასამართლო პრაქტიკის ჭრილში. 2016 წლის განმავლობაში დაგეგმილია ქართველ მოსამართლეთა ორ სამუშაო ვიზიტი (ჰოსპიტაცია) დრეზდენის უმაღლეს სასამართლოში. თავის მხრივ, თბილისის სააპელაციო სასამართლო მოხარული იქნება კვლავ უმასპინძლოს მეგობარი სასამართლოს მოსამართლეებს. თბილისის სააპელაციო სასამართლო მადლობას უხდის გერმანიის საერთაშორისო თანამშრომლობის საზოგადოებას (GIZ) ვიზიტის ორგანიზებისა და თანამშრომლობის მხარდაჭერისთვის.
ვრცლად
საქსონიის მხარის იუსტიციის სახელმწიფო მინისტრის ვიზიტი თბილისის სააპელაციო სასამართლოში
2016-04-14
2016 წლის 14 აპრილს, 09:00 საათზე, თბილისის სააპელაციო სასამართლოს ეწვივნენ გერმანიის საქსონიის მხარის იუსტიციის სახელმწიფო მინისტრი ბატონი სებასტიან გემკოვი და დრეზდენის უმაღლესი სამხარეო სასამართლოს მოსამართლეთა დელეგაცია სასამართლოს პრეზიდენტის ბატონი ულრიხ ჰაგენლოხის ხელმძღვანელობით. თბილისის სააპელაციო სასამართლოს თავმჯდომარემ ბატონმა ვალერი ცერცვაძემ, საქართველოს იუსტიციის უმაღლესი საბჭოს მოსამართლე წევრებმა და სასამართლოს სხვა მოსამართლეებმა გერმანელ სტუმრებთან ერთად იმსჯელეს დრეზდენის უმაღლეს სამხარეო სასამართლოსა და თბილისის სააპელაციო სასამართლოს შორის წარმატებული თანამშრომლობის შედეგებსა და სამომავლო განვითარების პერსპექტივებზე. თბილისის სააპელაციო სასამართლოსა და დრეზდენის უმაღლეს სამხარეო სასამართლოს შორის უკვე მეოთხე წელია წარმატებით მიმდინარეობს თანამშრომლობა. რეგულარული ორმხრივი ვიზიტების ფარგლებში არაერთ ქართველ მოსამართლეს (მათ შორის პირველი და საკასაციო ინსტანციის სასამართლოებიდან) მიეცა შესაძლებლობა გერმანელ კოლეგებთან ერთად მიეღო მონაწილეობა ქართული მართლმსაჯულებისათვის აქტუალური და მნიშვნელოვანი საკითხების თაობაზე გამართულ დისკუსიებში. თბილისის სააპელაციო სასამართლო მოხარულია იმ ფაქტით, რომ გერმანიის მთავრობა და მართლმსაჯულება დაინტერესებულია საქართველოს სასამართლოებთან თანამშრომლობით და მუდმივად მხარში უდგას ქართულ მართლმსაჯულებას. დიდი იმედი გვაქვს იუსტიციის სახელმწიფო მინისტრის ვიზიტი საქართველოში ხელს შეუწყობს არსებული თანამშრომლობის გაგრძელებასა და საინტერესო მიმართულებით განვითარებას. თბილისის სააპელაციო სასამართლო მადლობას უხდის გერმანიის საერთაშორისო თანამშრომლობის საზოგადოებას (GIZ) ვიზიტის ორგანიზებისა და თანამშრომლობის ფინანსური მხარდაჭერისთვის.
ვრცლად
ახალი სასამართლო ფორმები
2016-04-01
საქართველოს იუსტიციის უმაღლესი საბჭოს 2016 წლის 14 მარტის №1/107 გადაწყვეტილებით, სამოქალაქო და ადმინისტრაციულ საქმეზე სარჩელის, პასუხის (შესაგებლისა) და საჩივრის ფორმებში შეტანილ იქნა ცვლილებები, რომლებიც ამოქმედდება 2016 წლის 1 აპრილიდან. აღნიშნული ცვლილებების მიხედვით, სამოქალაქო და ადმინისტრაციულ საქმეზე სააპელაციო და საკასაციო საჩივრის (შესაგებლის) შეტანისას, როგორც წესი, წარდგენილი უნდა იქნეს შევსებული ფორმის ელექტრონული ვერსიაც (გარდა იმ შემთხვევისა, როდესაც ფორმა არ არის წარდგენილი ნაბეჭდი სახით), ხოლო გასაჩივრებული გადაწყვეტილების ფაქტობრივ უსწორობაზე მითითებისას (თუ მითითება ხდება სხდომის ოქმზე) უნდა აღინიშნოს დროის ის მონაკვეთი, როდესაც ოქმში მხარისათვის მნიშვნელოვან გარემოებაზეა საუბარი. ამასთან, სამოქალაქო საქმეზე სარჩელისა და შესაგებლის ფორმას დაემატა შეკითხვა საქმის სასამართლო მედიაციისათვის გადაცემასთან დაკავშირებით. სასამართლოს ახალი ფორმები განთავსებულია ჩვენი ვებ-გვერდის "ფორმების" განყოფილებაში. ყველა ფორმა ერთად შეგიძლიათ გადმოიწეროთ ამ სიახლეზე მიმაგრებული ფაილიდან.
ვრცლად
უკრაინის დელეგაციის ვიზიტი სასამართლოში
2016-02-22
თბილისის სააპელაციო სასამართლოს უკრაინის სასამართლოების მოხელეთა პროფესიული ასოციაციის წარმომადგენლები ესტუმრნენ. შეხვედრის ფარგლებში, ასოციაციის პრეზიდენტმა ნატაშა ჩუმაკმა სასამართლოს წარმომადგენლებს გააცნო მათი საქმიანობის ძირითადი მიმართულებები და სამომავლო გეგმები, რის შემდეგაც თბილისის სააპელაციო სასამართლოს თავმჯდომარის ბიუროს ინიციატივით დაფუძნებული ანალოგიური ასოციაციის პრეზენტაციაც მოხდა. მხარეებმა სურვილი გამოთქვეს პროექტების ერთად განხორციელების და სამომავლო თანამშრომლობის გეგმა დასახეს.
ვრცლად
ტრენინგი ადამიანის უფლებათა ევროპულ სტანდარტებზე
2016-02-19
17-18 თებერვალს, ყვარელში, ევროკავშირისა და ევროპის საბჭოს ერთობლივი პროექტის ფარგლებში გაიმართა ტრენინგი ადამიანის უფლებათა ევროპულ სტანდარტებსა და კვლევის მეთოდოლოგიაზე. ტრენინგი განკუთვნილი იყო უზენაესი, სააპელაციო და საქალაქო სასამართლოების, იუსტიციის უმაღლესი საბჭოსა და მთავარი პროკურატურის ანალიტიკური დეპარტამენტის თანამშრომლებისათვის. ტრენინგს უძღვებოდნენ ადამიანის უფლებათა ექსპერტები ჯერემი მაკბრაიდი და ნანა მჭედლიძე.
ვრცლად
© 2013, თბილისის სააპელაციო სასამართლო
ქ. თბილისი, გრ. რობაქიძის გამზ. 7ა, 0159
სატელეფონო ცენტრი: (+995 32) 251 85 21

საიტის ძველი ვერსია