მადლობის სიგელი
2015-11-06
თბილისის სააპელაციო სასამართლოს „ლეგალ საპორტ გრუპმა“ გადასცა მადლობის სიგელი „სამართლებრივი მხარდაჭერის ჯგუფთან“ სტუდენტთა სტაჟირების პროგრამის ფარგლებში თანამშრომლობისათვის. თბილისის სააპელაციო სასამართლო აქტიურად თანამშრომლობს პროფესიულ საგანმაგათლებლო ორგანიზაციებთან სასამართლო ტურის, იმიტირებული პროცესების, სტაჟიორების, პრაქტიკისა და სხვა აქტივობების ორგანიზების კუთხით. თბილისის სააპელაციო სასამართლო მოწოდებულია ხელი შეუწყოს პროფესიული იურიდიული და ზოგადსამართლებრივი მართშეგნების განვითარებას.
ვრცლად
თბილისის სააპელაციო სასამართლო 10 წლისაა
2015-11-01
1 ნოემბერს თბილისის სააპელაციო სასამართლოს დაარსებიდან 10 წელი შეუსრულდა. 2005 წელს განხორციელებული საკანონმდებლო ცვლილებების შედეგად, 1 ნოემბრიდან ამოქმედდა თბილისის სააპელაციო სასამართლო ინსტანცია, რითაც ძირეულად შეიცვალა საოლქო სასამართლოების მოდელი. თბილისის სააპელაციო სასამართლო ულოცავს თითოეულ მოსამართლესა და აპარატის თანამშრომელს სასამართლოს დაარსების 10 წლის იუბილეს და უსურვებს წარმატებებს კარიერაში.
ვრცლად
დისკუსია ელექტრონულ სამართალწარმოებაზე
2015-10-20
2015 წლის 19 ოქტომბერს თბილისის სააპელაციო სასამართლოში გაიმართა შეხვედრა დიუსელდორფის უმაღლესი ინსტანციის სამხარეო სასამართლოს მოსამართლე დოქტორ არნდ ვაისჰაუფთან. შეხვედრას ასევე ესწრებოდნენ საქართველოს უზენაესი სასამართლოსა და გერმანიის საერთაშორისო სამართლებრივი თანამშრომლობის ფონდის (IRZ) წარმომადგენლები. შეხვედრაზე განხილულ იქნა ელექტრონულ სამართალწარმოების თავისებურებები და მათი ზეგავლენა სასამართლო სისტემის ყოველდღიურ საქმიანობაზე. გაიმართა ნაყოფიერი დისკუსია და მხარეებმა მზადყოფნა გამოთქვეს ხელი შეუწყონ იმ კომპლექსური პროცესის სწორად და ეფექტიანად წარმართვას, რაც დაკავშირებულია სამართალწარმოების ელექტრონულად განხორციელების დანერგვასთან.  ანალოგიური სამუშაო შეხვედრები, გერმანიის საერთაშორისო სამართლებრივი თანამშრომლობის ფონდის (IRZ) ინიციატივით, გაიმართება სამივე ინსტანციის სასამართლოებში.
ვრცლად
არასრულწლოვანი მსჯავრდებული სასამართლო დარბაზიდან გაათავისუფლდა
2015-10-12
არასრულწლოვან პირს ბრალი ედებოდა სხვისი მფლობელობის (ავტომანქანის სალონი) ხელშეუხებლობის დარღვევაში, გათვალისწინებული საქართველოს სისხლის სამართლის კოდექსის 160-ე მუხლის პირველი ნაწილით. პირველი ინსტანციის განაჩენისგან განსხვავებით, თბილისის სააპელაციო სასამართლოს სისხლის სამართლის საქმეთა პალატამ 2015 წლის 2 ოქტომბერს არასრულწლოვან თ. ს.-ს სასჯელის ვადა შეუმცირა 6 თვით და გაათავისულდა სხდომის დარბაზიდან. სასამართლოს მიერ გათვალისწინებულ იქნა როგორც ბრალდებულის პიროვნება, ასევე ჩადენილი ქმედების ხასიათი.
ვრცლად
გამამართლებელი განაჩენი
2015-10-07
თბილისის საქალაქო სასამართლოს 2014 წლის 21 თებერვლის განაჩენით გ. ცნობილ იქნა დამნაშავედ საქართველოს სისხლის სამართლის კოდექსი მე-19, 109-ე მუხლის მე-3 ნაწილის „ა“ ქვეპუნქტით გათვალიწინებული დანაშაულის ჩადენისათვის (დამამძიმებელ გარემოებაში განზრახ მკვლელობის მცდელობა). ბრალდებულს სასჯელის სახედ და ზომად განესაზღვრა თავისუფლების აღკვეთა 16 წლის ვადით, რაც 2012 წლის 28 დეკემბრის „ამნისტიის შესახებ“ საქართველოს კანონის მე-7 მუხლის საფუძველზე გაუნახევრდა და განესაზღვრა თავისუფლების აღკვეთა 8 წლის ვადით. თბილისის სააპელაციო სასამართლოს 2015 წლის 28 სექტემბრის განაჩენით მსჯავრდებული გ. საქართველოს სსკ-ის მე-19, 109-ე მუხლის მე-3 ნაწილის „ა“ ქვეპუნქტით წარდგენილ ბრალდებაში გამართლდა და ცნობილ იქნა უდანაშაულოდ. სასამართლომ არასაკმარისად მიიჩნია მტკიცებულებები, რომელთაც ემყარებოდა წარდგენილი ბრალდება.
ვრცლად
იუსტიციის უმაღლესი სკოლა აცხადებს მიღებას
2015-10-06
იუსტიციის უმაღლესი სკოლა აცხადებს მიღებას სასამართლოს მოხელეთა (მოსამართლის თანაშემწე, სხდომის მდივანი, სასამართლოს სხვა მოხელეები) სპეციალურ სასაწავლო კურსზე. კურსი განკუთვნილია, უმაღლესი იურიდიული განათლების მქონე პირთათვის, რომლებმაც 21 წლის ასაკს მიაღწიეს და ფლობენ სახელმწიფო ენას. სასწავლო კურსის ხანგრძლივობა 2 თვიანია, რომლის ღირებულება შეადგენს 800 ლარს. კანდიდატებს საბუთების შემოტანა შეუძლიათ, 2015 წლის 29 სექტემბრიდან 12 ოქტომბრის ჩათვლით, 10:00 საათიდან 18:00 საათის ჩათვლით. მისამართი: ქ. თბილისი, პეკინის ქუჩა N29 (შესასვლელი ანა კალანდაძის (ყოფილი ბულაჩაურის) ქუჩიდან). დამატებითი ინფორმაციისთვის იხილეთ: www.HSOJ.ge დაგვიკავშირდით: (995 32) 2 38 11 61
ვრცლად
თბილისის სააპელაციო სასამართლოს განცხადება
2015-06-22
უკანასკნელ პერიოდში ე.წ. კაბელების საქმის განმხილველი მოსამართლის მიმართ მედია საშუალებებით სისტემატურად და მიზანმიმართულად ვრცელდება უსაფუძვლო ბრალდებების შემცველი და მოსამართლის საქმიანობის დისკრედიტაციისკენ მიმართული ინფორმაცია. მედია საშუალებებით გავრცელებული სიუჟეტები და კომენტარები ტოვებს განცდას, რომ შესაძლებელია ადგილია ჰქონდეს სასამართლოსა და მოსამართლის საქმიანობაში უხეში ჩარევისა და ამ საქმიანობაზე დაუშვებელი ზეწოლის მცდელობას. შეგახსენებთ, რომ საქართველოს კონსტიტუცია და არაერთი შიდასახელმწიფოებრივი და საერთაშორისო აქტი ავალდებულებს ყველას პატივი სცეს სასამართლოსა და მოსამართლის მაღალ სტატუსს და განსაკუთრებულ მნიშვნელობას სამართლებრივ და დემოკრატიულ საზოგადოებაში. თბილისის სააპელაციო სასამართლო მოუწოდებს ყველა მხარეს თავი შეიკავოს სასამართლოსა და მოსამართლის მიმართ დაუსაბუთებელი, ხშირად არაეთიკური, ბრალდებების გავრცელებისა და მიზანმიმართული, ცილისმწამებლური კამპანიის წარმოებისაგან.
ვრცლად
გერმანელი და პოლონელი მოსამართლეების ვიზიტი
2015-06-19
2015 წლის 11-12 ივნისს თბილისის სააპელაციო სასამართლოში სტუმრად იმყოფებოდნენ დრეზდენის უმაღლესი სასამართლოსა (OLD) და ვროცლავის სააპელაციო სასამართლოს მოსამართლეები. ვიზიტი წარიმართა დისკუსიის ფორმატში. მოსამართლეებმა შეხვედრების განმავლობაში განიხილეს ისეთი მნიშვნელოვანი და ქართული რეალობისთვის აქტუალური საკითხები, როგორიცაა: ● სასამართლოსა და მოსამართლის მიერ საქმეთა ნაკადის ეფექტიანი მართვის მიდგომები და ტექნიკები; ● მტკიცების ტვირთის განაწილების პრობლემები; ● უძრავი ქონების შეძენის ნამდვილობის პრობლემები; ● უსაფუძვლო გამდიდრებასთან დაკავშირებული ნორმების გამოყენების პრობლემები შესრულების კონდიქციის, ხარჯების კონდიქციის და ხელყოფის კონდიქციის დროს; ● დავალების გარეშე სხვისი საქმეების შესრულებისა და უსაფუძვლო გამდიდრების ურთიერთგამიჯვნასთან დაკავშირებული პრობლემები. თბილისის სააპელაციო, დრეზდენის უმაღლეს და ვროცლავის სააპელაციო სასამართლოებს შორის თანამშრომლობა მესამე წელია მიმდინარეობს. ამ პერიოდის განმავლობაში ჩატარდა არაერთი გაცვლითი ვიზიტი, ჰოსპიტაცია და კონფერენცია. თბილისის სააპელაციო სასამართლო დიდ მნიშვნელობას ანიჭებს თანამშრომლობას გერმანელ და პოლონელ მოსამართლეებთან და განსაკუთრებულ მადლობას უხდის გერმანიის საერთაშორისო თანამშრომლობის საზოგადოებას (GIZ) მხარდაჭერისათვის.
ვრცლად
თბილისის სააპელაციო სასამართლო თბილისში სტიქიის შედეგად დაღუპულთა ოჯახებს უსამძიმრებს
2015-06-15
თბილისის სააპელაციო სასამართლო მწუხარებას გამოთქვამს და თანადგომას უცხადებს თბილისში, მდინარე ვერეს ადიდების გამო, გარდაცვლილთა ოჯახებს და სტიქიით დაზარალებულებს. საქართველოს უზენაეს სასამართლოში შეიქმნა სტიქიის შედეგად დაზარალებულთა დახმარების შტაბი, სადაც შეგროვდება საჭირო ნივთები, მედიკამენტები, პირველადი მოხმარების ნივთები, ტანსაცმელი და საკვები. თბილისის სააპეალაციო სასამართლოს მოსამართლეები და თანამშრომლები უერთდებიან აღნიშნულ აქციას. ნივთები სასამართლოში შეგროვდება და შემდეგ მოხდება მათი ტრანსპორტირება უზენაეს სასამართლოში განთავსებულ დაზარებულთა დახმარების შტაბში. დამატებითი ინფორმაციისათვის, გთხოვთ, დაუკავშირდით თბილისის სააპელაციო სასამართლოს კადრების სამსახურს.
ვრცლად
საჯარო წესრიგის ცნების გამოყენება სასამართლო პრაქტიკაში
2015-06-05
2015 წლის 30 მაისს, სასტუმრო თბილისი მერიოტში, თბილისისა და ქუთაისის სააპელაციო სასამართლოს სამოქალაქო საქმეთა პალატების მოსამართლეებისა და მოსამართლის თანაშემწეებისთვის ჩატარდა დისკუსია თემაზე: საჯარო წესრიგის ცნების გამოყენება სასამართლო პრაქტიკაში. დისკუსიას უძღვებოდა კომერციული დავების განხილვაში მრავალწლიანი გამოცდილების მქონე, ჰოლანდიელი მოსამართლე და არბიტრი, ბატონი ბარტ პუნტი. დისკუსია გაიმართა საერთაშორისო გამჭვირვალობა - საქართველოს ორგანიზებით, თბილისის სააპელაციო სასამართლოს ორგანიზაციული და საქართველოში ნიდერლანდების საელჩოს ფინანსური მხარდაჭერით.
ვრცლად
სტაჟიორთა მისაღები კონკურსი
2015-06-03
თბილისის სააპელაციო სასამართლოს სტაჟირების კომისია აცხადებს კონკურსს სტაჟიორთა მისაღებად. კონკურსი ჩატარდება ორ ეტაპად, განაცხადების გადარჩევის და გასაუბრების ფორმით. სააპლიკაციო ფორმის წარმოდგენის ბოლო ვადაა 2015 წლის 11 ივნისი. დამატებითი ინფორმაცია შეგიძლიათ იხილოთ შემდეგ მისამართზე: www.hr.gov.ge, "ვაკანსიების ძებნის" გვერდზე, ველში "დამსაქმებელი", მიუთითეთ "თბილისის სააპელაციო სასამართლო". სტაჟირების ვადა განისაზღვრება 6 თვით. სტაჟირების წარმატებით გავლის შემთხვევაში სტაჟიორებს გადაეცემათ სერტიფიკატი.
ვრცლად
თბილისის სააპელაციო სასამართლოს თავმჯდომარის კომენტარი
2015-05-19
გთავაზობთ, 18 მაისს მართლმსაჯულების სასახლეში გამართულ შეხვედრაზე, თბილისის სააპელაციო სასამართლოს თავმჯდომარის ბატონ ვალერი ცერცვაძის კომენტარს, განსახორციელებელ საკანონმდებლო ცვლილებათა პაკეტთან დაკავშირებით.
ვრცლად
სტუდენტების ვიზიტი
2015-05-11
2015 წლის 8 მაისს თბილისის სააპელაციო სასამართლოს სასამართლოს სასამართლო ტურის პროექტის ფარგლებში ესტუმრნენ აღმოსავლეთ ევროპის უნივერსიტეტის (EEU) I და II კურსის სტუდენტები. სტუდენტება მოისმინეს პრეზენტაციები სასამართლო სისტემის, ატრიბუტიკის, მოსამართლისა და სასამართლოს დამოკიდებლობისა და სამართლებრივი ნოვაციების შესახებ. პრეზენტაციის შემდეგ სტუდენტებმა დაათვალიერეს სასამართლოს შენობა და სხდომის დარბაზები. თბილისის სააპელაციო სასამართლო განსაკუთრებით დიდ მნიშვნელობას ანიჭებს მომავალი თაობის სამართლებრივი კულტურის განვითარებას და მომავალშიც აქტიურად შეუწყობს ხელს მსგავსი საგანმანათლებლო აქტივობების განხორციელებას.
ვრცლად
განცხადება ინტერნეტ გამოცემა ექსპერნიუსზე (epn.ge) გავრცელებულ სტატიასთან დაკავშირებით
2015-04-22
თბილისის სააპელაციო სასამართლოს ადმინისტრაციულ საქმეთა პალატამ ზეპირი მოსმენის გარეშე განიხილა კერძო საჩივარი საყდრისის სტატუსთან დაკავშირებულ საქმეზე და მიიღო გადაწყვეტილება 2015 წლის 14 აპრილს. განჩინების სარეზოლუციო ნაწილი საქმეში მონაწილე მხარეებს ეცნობათ იმავე დღეს, ხოლო დასაბუთებული განჩინება მომზადდა და ქალბატონ ნინო მიქიაშვილს ჩაბარდა 2015 წლის 21 აპრილს. სასამართლო დამატებით აღნიშნავს, რომ დასაბუთებული განჩინების მომზადების კანონით დადგენილი ვადა შეადგენს 14 დღეს, რომელიც მოცემული საქმის შემთხვევაში იწურება 2015 წლის 28 აპრილს.
ვრცლად
სასამართლო სხდომის დარბაზში ფოტოგადაღების, კინო-, ვიდეო-, აუდიოჩაწერის შესახებ განცხადების ფორმა
2015-04-21
თბილისის სააპელაციო სასამართლოს მიერ შემუშავდა სასამართლო სხდომის დარბაზში ფოტოგადაღების, კინო-, ვიდეო-, აუდიოჩაწერის შესახებ განცხადების ფორმა. განცხადების ფორმა განთავსებულია პრესსამსახურის გვერდზე. ვიმედოვნებთ, რომ წარმოდგენილი ფორმა გაამარტივებს სასამართლოსთვის მიმართვისა და მიმდინარე სხდომების გაშუქების პროცესს.
ვრცლად
ვიზიტი ვროცლავის სააპელაციო სასამართლოში (პოლონეთი)
2015-04-21
საქართველოს უზენაესი, თბილისის სააპელაციო, თბილისის საქალაქო და ბოლნისის რაიონული სასამართლოს მოსამართლეები, დრეზდენის მიწის უმაღლესი სასამართლოს მოსამართლეებთან ერთად, 20 აპრილიდან 24 აპრილის ჩათვლით სამუშაო ვიზიტით იმყოფებიან ვროცლავის სააპელაციო სასამართლოში (პოლონეთი). ვიზიტის ფარგლებში დელეგატები გაეცნობიან მოსამართლეთა საქმიანობისა და სასამართლოს ადმინისტრირების მიმართულებებით პოლონურ გამოცდილებს, შეხვდებიან მასპინძელი სასამართლოს მოსამართლეებსა და სასამართლო მოხელეებს. ვიზიტი დაიგეგმა და ხორციელდება გერმანიის საერთაშოროსი თანამშრომლობის საზოგადოების (GIZ) მხარდაჭერით, თბილისის სააპელაციო სასამართლოს, დრეზდენის მიწის უმაღლესი სასამართლოსა (OLG) და ვროცლავიის სააპელაციო სასამართლოს თანამშრომლობის ფარგლებში. აღნიშნული თანამშრომლობა სამი წლის წინ დაიწყო თბილისის სააპელაციო სასამართლოსა და დრეზდენის მიწის უმაღლეს სასამართლოს შორის, რომელსაც 2014 წელს ვროცლავიის სააპელაციო სასამართლო შეუერთდა. ქართველ, გერმანელ და პოლონელ მოსამართლეებს შორის თანამშრომლობის ფარგლებში მრავალ საინტერესო ინიციატივას ჩაეყარა საფუძველი, ჩატარდა არაერთი მნიშვნელოვანი შეხვედრა და გაცნობითი ვიზიტი.
ვრცლად
სასამართლო განჩინება რუსთავის მეტალურგიულ ქარხანასთან დაკავშირებულ დავაზე
2015-04-07
მაღალი საზოგადოებრივი ინტერესიდან გამომდინარე სააპელაციო სასამართლო მიზანშეწონილად მიიჩნევს განმარტოს სააპელაციო სასამართლოს მიერ მიღებული განჩინება, რომელიც გამოტანილი იქნა რუსთავის მეტალურგიულ ქარხანასთან დაკავშირებულ დავაზე. სააპელაციო სასამართლომ განიხილა სს „ქართული ფოლადის“, შპს „რუსთავის ფოლადის“ და შპს „რუსთავის ინდუსტრიული ჯგუფის“ სააპელაციო საჩივრები თბილისის საქალაქო სასამართლოს 2015 წლის 24 თებერვლის გადაწყვეტილებაზე, რომლითაც დაკმაყოფილდა ეთერ მთვრალაშვილის სარჩელი, ბათილად იქნა ცნობილი 2011 წლის 27 დეკემბერს ს.ს. „ქართული ფოლადს“ და შ.პ.ს. „რუსთავის ინდუსტრიულ ჯგუფს“ შორის და 2011 წლის 27 დეკემბერს შ.პ.ს. ,,რუსთავის ინდუსტრიულ ჯგუფს” და შ.პ.ს. ,,რუსთავის ფოლადს” შორის დადებული ნაყარი წიდის და ნაცრის ნასყიდობის ხელშეკრულება; ასევე, ბათილად იქნა ცნობილი ს.ს. ,,ქართული ფოლადს” და შ.პ.ს. „რუსთავის ფოლადს“ შორის 2011 წლის 27 დეკემბერს დადებული აქტივების ნასყიდობის ხელშეკრულება. აღდგენილ იქნა პირვანდელი მდგომარეობა და გასხვისებული ქონება საკუთრებაში დაუბრუნდა ს.ს. „ქართული ფოლადს“. თბილისის საქალაქო სასამართლოს მიერ დავის მიმდინარეობისას მოსარჩელის განცხადების საფუძველზე გამოყენებული იქნა სარჩელის უზრუნველყოფის ღონისძიება ნასყიდობის საგნის: აქტივების, ნაყარი წიდის და ნაცრის გასხვისების აკრძალვის სახით. სააპელაციო პალატამ დავის მიმდინარეობისას განიხილა სარჩელის უზრუნველყოფის ღონისძიების გამოყენების შესახებ პირველი ინსტანციის სასამართლოს განჩინების კანონიერების საკითხი და მიიჩნია, რომ განჩინება იყო დასაბუთებული, კანონიერი და არ არსებობდა მისი გაუქმების ან უზრუნველყოფის საშუალების შეცვლის სამართლებრივი საფუძველი. სააპელაციო პალატამ განმარტა, რომ მართალია ეთერ მთვრალაშვილის იურიდიულ ინტერესს წარმოადგენდა მხოლოდ 4553.48 ლარის მიღება, თუმცა დავის საგანს წარმოადგენდა არა თანხის დაკისრება, არამედ ნასყიდობის ხელშეკრულებების ბათილობა და გასხვისებული ქონების პირვანდელი მესაკუთრისათვის დაბრუნება. განსახილველი დავის საგნიდან გამომდინარე, სასამართლომ მიიჩნია, რომ თუ დავის პერიოდში გასხვისდებოდა სადავო ქონება, სარჩელის დაკმაყოფილების პირობებში, სასამართლოს მიღებული გადაწყვეტილება ქონების პირვანდელი მესაკუთრისთვის დაბრუნების ნაწილში აღუსრულებელი დარჩებოდა. სააპელაციო სასამართლოში საქმის განხილვისას აპელანტმა მხარემ წარმოადგინა ახალი მტკიცებულება და მიუთითა ახალ ფაქტობრივ გარემოებაზე, რამაც განსაზღვრა საქმის საბოლოო შედეგი. ახალი მტკიცებულებით დადგინდა, რომ სააპელაციო სასამართლოში დავის მიმდინარეობისას 2015 წლის 17 მარტს, შპს „რუსთავის ფოლადის“ მიერ ნოტარიუსთან დეპონირების გზით შესრულებული იქნა მოსარჩელე ეთერ მთვრალაშვილის მიმართ სს „ქართული ფოლადის“ ვალდებულება. სამოქალაქო კოდექსის 434-ე მუხლის მე-2 ნაწილით თანხის დეპონირების შემთხვევაში მოვალე თავისუფლდება ვალდებულებისგან. შესაბამისად, სს „ქართულ ფოლადს“ ეთერ მთვრალაშვილის მიმართ 2015 წლის 17 მარტიდან სადავო ვალდებულება აღარ გააჩნია. ამ გარემოების გათვალისწინებით, სასამართლომ მიიჩნია, რომ სადავო გარიგებების კანონიერების და ქონების სს „ქართული ფოლადის“ საკუთრებაში დაბრუნების მოთხოვნის მიმართ 2015 წლის 17 მარტიდან აღარ არსებობს ეთერ მთვრალაშვილის იურიდიული ინტერესი, რის გამოც მისი სარჩელი განუხილველად იქნა დატოვებული, გაუქმდა საქმეზე გამოყენებული სარჩელის უზრუნველყოფის ღონისძიება და ეთერ მთვრალაშვილის სასარგებლოდ სს „ქართულ ფოლადს“ შპს „რუსთავის ფოლადს“ და შპს „რუსთავის ინდუსტრიულ ჯგუფს“ დაეკისრა 3050 ლარის ანაზღაურება მოსარჩელის მიერ გაწეული სასამართლო ხარჯების სახით. სააპელაციო სასამართლოს განჩინებაზე დაიშვება კერძო საჩივარი და მისი წარმოდგენის შემთხვევაში საქმე განსახილველად გაეგზავნება საქართველოს უზენაესი სასამართლოს სამოქალაქო საქმეთა პალატას.
ვრცლად
იმიტირებული სასამართლო პროცესი
2015-04-01
2015 წლის 31 მარტს თბილისის სააპელაციო სასამართლოში იუსტიციის უმაღლესი სკოლის სასამართლოს მოხელეთა კურსის სტუდენტებმა იმიტირებული სასამართლო პროცესი ჩაატარეს. სასამართლოს მოხელეთა კურსის მიზანია ხელი შეუწყოს მომავალი მოსამართლის თანაშემწეების, სხდომის მდივნებისა და კანცელარიის თანამშრომლების მომზადებას. იმიტირებული სასამართლო პროცესების ჩატარებით სტუდენტები იღებენ რეალურობასთან მაქსიმალურად მიახლოვებულ გამოცდილებას საქმის წარმოების უმთავრესი ეტაპის - საქმის ზეპირი მოსმენის შესახებ.
ვრცლად
მოსწავლეთა იმიტირებული სასამართლო პროცესი
2015-03-23
თბილისის სააპელაციო სასამართლოში იმიტირებული სასამართლო პროცესი ჩაატარეს თბილისის 64-ე საჯარო სკოლის მოსწავლებმა. იმიტირებული პროცესის დასრულების შემდეგ ყველა მოსწავლეს საჩუქრად გადაეცა გერმანიის საერთაშორისო თანამშრომლობის საზოგადოების (GIZ) გამოცემა - "სამართლის ქალაქი". თბილისის სააპელაციო სასამართლო განსაკუთრებით დიდ მნიშვნელობას ანიჭებს მომავალი თაობის სამართლებრივი კულტურის განვითარებას და მომავალშიც აქტიურად შეუწყობს ხელს მსგავსი საგანმანათლებლო აქტივობების განხორციელებას.
ვრცლად
დრეზდენის უმაღლესი სასამართლოს დელეგაციის ვიზიტი
2015-03-06
თბილისის სააპელაციო სასამართლოში დრეზდენის უმაღლესი სასმართლოს მოსამართლეთა დელეგაციის ხუთდღიანი ვიზიტი დასრულდა. ვიზიტის ფარგლებში, შედგა სამუშაო შეხვედრები, როგორც სააპელაციო ისე საქალაქო სასამართლოში. სააპელაციო სასამართლოში შეხვედრისას, მხარეებმა განიხილეს ხარისხის მენეჯმენტთან, მომხმარებელთა კვლევისა და კვლევების შემდგომი ანალიზის მეთოდები. სტუმრები გაეცნენ კანცელარიის მუშაობის თავისებურებებს, ასევე დააკვირდნენ სხდომის მდივანთა და თანაშემწეების მუშაობის სტილს. სტუმრები დაესწრნენ რამდენიმე სამოქალაქო პროცესსაც. თბილისის სააპელაციო სასამართლო მადლობას უხდის გერმანიის საერთაშორისო თანამშრომლობის საზოგადოებას (GIZ) შეხვედრის ორგანიზებისათვის. აქვე შეგახსენებთ, რომ თბილისის სააპელაციო სასამართლოსა და გერმანიის სხვადასხვა სასამართლოებს შორის, ინტენსიური თანამშრომლობა უკვე ორ წელზე მეტია ხორციელდება.
ვრცლად
მოსწავლეების ტური სააპელაციო სასამართლოში
2015-03-02
თბილისის სააპელაციო სასამართლოს განგრძობადი განათლების პროექტის ფარგლებში “დემირელის სახელობის კერძო კოლეჯის“ და ექვთიმე თაყაიშვილის 163-მე სკოლის მოსწავლეები ესტუმრნენ. ვიზიტის ფარგლებში, მოსწავლეებმა მოისმინეს პრეზენტაცია სასამართლო სისტემის, არასრულწლოვანთა უფლებებისა და სამოსამართლო საქმიანობის შესახებ. პრეზენტაციის ფარგლებშივე განხილული იქნა, სასამართლო ინსტანციებს შორის განსხვავებები, სასამართლო ატრიბუტიკის თავისებურებები. სიახლეა ისიც, რომ სასამართლო ტურს დაემატა ერთი საინტერესო რუბრიკა: „ ამოხსენი კაზუსი“; ტურის ფარგლებში მოსწავლეები ისმენენ კაზუსს საბავშვო-სახალისო სამართლის წიგნიდან „სამართლის ქალაქი“ - სანამ ისინი კაზუსის პასუხს გაიგებენ თავად ცდილობენ კაზუსს სამართლებრივი დასაბუთება მოუძებნონ. ლექციის დასრულების შემდგომ, მოსწავლეებმა სასამართლოს შენობა დაათვალიერეს, იხილეს სხდომათა დარბაზები და დაესწრნენ მიმდინარე სისხლის სამართლის პროცესს.
ვრცლად
© 2013, თბილისის სააპელაციო სასამართლო
ქ. თბილისი, გრ. რობაქიძის გამზ. 7ა, 0159
სატელეფონო ცენტრი: (+995 32) 251 85 21

საიტის ძველი ვერსია